धनगढी/उद्यमी युवा समृद्ध देश : दिगो विकास लक्ष्यमा समान परिवेश” भन्ने मुल नाराका साथ नेपाल युवा परिषद सुदूरपश्चिम प्रदेशले आयोजना गरेको तीन दिने प्रदेश युवा सम्मेलन शनिबार धनगढीमा सम्पन्न भएको छ ।
नेपाल युवा परिषद सुदूरपश्चिम प्रदेश संयोजक बसन्ती सापकोटाको सभापतित्वमा सम्पन्न भएको प्रदेश युवा सम्मेलनमा सुदूरपश्चिम प्रज्ञा प्रतिष्ठानका उपकुलपति डा. टी.एन जोशी प्रमुख अतिथि रहेका थिए । त्यसैगरि कार्यक्रमको विशिष्ट अतिथिमा नेपाल युवा परिषदका केन्द्रिय अध्यक्ष सरोज बानिया, अतिथिहरुमा जिआईजेडका प्रतिनिधि कृष्ण मल्ल लगायत रहेका थिए ।
कार्यक्रमका प्रमुख अतिथि सुदूरपश्चिम प्रज्ञा प्रतिष्ठानका उपकुलपति डा. टी.एन जोशीले प्रदेश सरकार संग युवाहरुका मागहरुका सम्बन्धमा आफूले सक्दो पहल गर्ने बताए । उनले प्रज्ञा प्रतिष्ठानले युवाहरुका हकहितका सम्बन्धमा सदैव सहयोग गर्ने तत्पर रहेको जानकारी दिए ।
तीन दिन सम्म संचालन भएको सम्मेलनमा युवाका विभिन्न क्षेत्रमा काम गर्ने विभिन्न संघ संस्थाका विज्ञहरुले कार्यक्रममा सहभागी युवाहरुलाई प्रशिक्षण दिएका थिए ।
सम्मेलनले १४ बुँदे धनगढी घोषणापत्र जारी गरेको छ । नेपाल युवा परिषदका केन्द्रिय अध्यक्ष सरोज बानियाले उक्त घोषणा पत्रलाई स्थानिय सरकार, प्रदेश सरकारलाई बुझाउने जनाएको छ ।
तीन दिन सम्म संचालन भएको युवा सम्मेलनले समाजमा महत्वपूर्ण योगदान दिएका व्यक्तिहरुलाई विभिन्न विधामा सम्मान गरेको थियो । सम्मेलनमा सुदूरपश्चिम प्रदेशका ९ जिल्लाका २ सय भन्दा बढी युवाहरुको कार्यक्रममा सहभागिता रहेको आयोजकले जनाएको छ ।
