धनगढी । सुदूरपश्चिम प्रदेश सरकारको मन्त्रिपरिषद् बैठकले सामाजिक विकास मन्त्रालय र भौतिक पूर्वाधार विकास मन्त्रालयमा सचिव पदस्थापन गर्ने निर्णय गरेको छ।
मन्त्रिपरिषद्को बैठकले सामाजिक विकास मन्त्रालयको सचिवमा संगीता ओझा र भौतिक पूर्वाधार विकास मन्त्रालयको सचिवमा पदमराज देवकोटालाई पदस्थापन गर्ने निर्णय गरेको हो।
मन्त्रालयहरूमा सचिवको पद रिक्त हुँदा बजेट निर्माणलगायत मन्त्रालयका नियमित काम प्रभावित हुँदै आएको अवस्थामा प्रदेश सरकारले सचिव पदस्थापन गरेको हो। सचिव पदपूर्तिसँगै बजेट निर्माण प्रक्रियामा देखिएको ढिलाइ हटाउँदै कामलाई थप गति दिने अपेक्षा गरिएको छ।
यसअघि सुदूरपश्चिम प्रदेश सरकारको प्रमुख सचिवमा सरुवा हुनुभएका उत्तमकुमार खत्री सोमबार प्रदेशमा उपस्थित भइसक्नुभएको छ। प्रमुख सचिवको उपस्थितिसँगै मन्त्रालयहरूमा सचिवको पदस्थापनसमेत भएपछि प्रदेश सरकारको बजेट निर्माण तथा कार्यसम्पादनले थप गति लिने अपेक्षा गरिएको छ।
