टीकापुर/ नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले गरेको नेपाल बन्दको प्रभाव टीकापुर लगायतका सुदूरपश्चिम प्रदेशका प्रमुख शहरहरुमा परेको छ ।
सुदूरपश्चिम प्रदेशका मुख्य शहरका बजार व्यवसाय लगायत महेन्द्र राजमार्ग, अतरिया डडेल्धुरा राजमार्ग बन्दका कारण सवारि साधन नचल्दा यहाँको जनजीवन प्रभावित भएको छ ।
टीकापुर सहित प्रदेशका सबै जिल्लाका मुख्य बजारहरुमा बिहानै देखि सवारी साधन नचलेको सुदूरपश्चिम प्रदेश ट्राफिक प्रहरी कार्यालय अत्तरियाका प्रमुख प्रहरी उपरीक्षक वामदेव गौतमले जानकारी दिनुभयाे ।
बजार, कलकारखाना, बैंक तथा वित्तीय संस्था तथा शैक्षिक संस्था पनि बन्द रहे भने माेटरसाइकल फाट्टफुट्ट चलिरहेका थिए । बन्दका कारण लामो तथा छोटो दूरीका सवारी साधन नचलेपछि काम विशेषले गन्तव्य जाने यात्रुहरु मर्कामा परेका छन् ।
सरकारले पेट्रोलियम पदार्थको मूल्य वृद्धि गरेको भन्दै नेत्रविक्रम चन्द विप्लव नेतृत्वको नेपाल कम्युनिस्ट पार्टीले आज मंगलबार नेपाल बन्द आह्वान गरेको हो।
