धनगढी- सुदूरपश्चिम प्रदेशका सरकारी अस्पतालमा रगत निःशुल्क पाइने भएको छ । प्रदेशभरका सबै सरकारी अस्पतालमा आइतबारदेखि रगत निःशुल्क सेवाकाे सुरुवात प्रदेशका मुख्यमन्त्री कमलबहादुर शाहले गरेका छन् ।
मुख्यमन्त्री शाहले गत साउन २१ गते पदभार ग्रहण गर्दै प्रदेशभर निःशुल्क रगत व्यवस्था गर्ने निर्णय गरेका थिए । साेही निर्णयकाे कार्यान्वयन स्वरुप आजबाट प्रदेशभर निःशुल्क रक्त सेवा सुरु गरिएकाे हाे ।
सुदूरपश्चिम प्रदेशको सामाजिक विकास मन्त्रालयले नेपाल रेडक्रस सोसाइटी प्रादेशिक रक्त सञ्चार केन्द्र धनगढीसँग सहकार्य गरी ९ वटै जिल्लाका सरकारी अस्पतालबाट निःशुल्क रगत उपलब्ध गराउने भएको हो ।
प्रादेशिक रक्तसञ्चार केन्द्र धनगढी, नेपाल रेडक्रस सोसाइटीका नौवटै जिल्ला शाखा र टीकापुर उपशाखासँग निःशुल्क रगतका लागि आइतबार नै सम्झौता भएकाे छ ।
रेडक्रसले उपलब्ध गराउने नि:शुल्क रगतकाे प्रति पिन्ट एक हजार एक सय पचास प्रदेश सरकार ले भुक्तानी गर्ने सम्झौतामा उल्लेख छ ।
