टीकापुर/सत्तारूढ गठबन्धनले अमेरिकी सहयोग परियोजना एमसिसी व्याख्यात्मक टिप्पणी सहित संसदबाट पास गर्ने तयारी गरिरहेका बेला १६ गते नेपाल बन्दको आव्हान गरिएको छ ।
एमसीसी बिरोधि गठबन्धको आइतबार अपरान्ह बसेको बैठकले विज्ञप्ति मार्फत फागुन १६ गते नेपाल बन्द आव्हान गरेको हाे ।
विप्लव नेतृत्वको नेकपा, मोहन वैद्य ‘किरण’ नेतृत्वको नेकपा (क्रान्तिकारी माओवादी), सीपी गजुरेल नेतृत्वको देशभक्त जनगणतान्त्रिक मोर्चा नेपाल, ऋषि कट्टेल नेतृत्वको नेपाल कम्युनिस्ट पार्टी, कर्णजित बुढाथोकी नेतृत्वको नेकपा माओवादी केन्द्र समाजवादी र आहुती नेतृत्वको वैज्ञानिक समाजवादी कम्युनिस्ट पार्टीले नेपाल बन्दकाे आह्वान गरेका हुन् ।
यी ५ पार्टी र मोर्चाले एमसीसी संसदमा लैजानु भन्दा पहिलेदेखि नै बिरोध गर्दै आएका छन् । संसदमा टेबल गरिएको अमेरिकी मिलेनियम च्यालेन्ज कर्पोरेसन (एमसीसी) सम्झौतामाथि आइतबार दिउसो देखि छलफल चलिरहेको छ । देउवा सरकारले आइतबार एमसीसी पास गर्ने तयारी समेत गरेको थियाे ।
नेपाली र अंग्रेजी दुबै भाषामा लेखिएको व्याख्यात्मक टिप्पणीमा एमसिसी अमेरिकी सैन्य गठबन्धनको रणनीति नभएको, यो सम्झौता नेपालको संविधान र कानुनभन्दा माथि नरहेको लगायत बुँदाहरू समेटेर पास गर्ने तयारी भएको थियाे ।
