टीकापुर/मंसीर ४ गते हुने प्रतिनिधि सभा तथा प्रदेश सभाको निर्वाचनमा नागरिक उन्मुक्ति पार्टीले दुबै तहमा गरी ४ सय स्थानमा उम्मेदवार उठाउने तयारी गरेकाे छ ।
अहिले सम्मकाे तयारी अनुसार प्रतिनिधि सभाका १५० र प्रदेश सभाका २५० क्षेत्र गरी ४ सय उम्मेदवार तय भएको पार्टीले जनाएको छ ।
नागरिक उन्मुक्ति पार्टीले हालसम्म ४१ जिल्लामा उम्मेदवारी दिने तय भैसकेको जनाएकाे छ ।
तराईसंगै पहाडमा समेत पार्टीकाे पक्कड बलियाे देखिन थालेकाे जनाइएको छ । नागरिक उन्मुक्ति पार्टीले काठमाडौं, ललितपुरबाट समेत उम्मेदवार उठाउने तय गरिएको छ । त्यस्तै कञ्चनपुर, कैलाली, बाँके, बर्दिया, सुर्खेत, दाङ, कपिलवस्तु, रुपन्देही, नवलपुर, परासी, चितवन, बारा, पर्सा, रौतहट, सप्तरी, सर्लाही, महोत्तरी, सिन्धुली, सिरहा, सुनसरी, मोरङ जिल्ला रहेका छन् ।
त्यस्तै, अछाम, बझाङ, बाजुरा, डडेल्धुरा, दैलेख, दार्चुला, डोटी, हुम्ला, जाजरकोट, झापा, जुम्ला, कालिकोट, मुगु, रामेछाप, उदयपुर, काभ्रे, दोलखा र नुवाकोटबाट पनि उम्मेदवारी दिने भएको छ । पार्टी संगठन विस्तारकै क्रममा रहेकाले उम्मेदवार हुन सक्ने जिल्ला अझ थपिन सक्ने स्राेतले जनाएको छ ।
यसै विच कैलाली क्षेत्र नम्बर १ बाट नागरिक उन्मुक्ति पार्टीका अध्यक्ष एवम् रेशम चौधरीका पत्नी रञ्जिता श्रेष्ठ चौधरीले चुनाव लड्ने घोषणा गरेकी छन् । चौधरीले प्रतिनिधि सभा निर्वाचनका लागि मंगलबार आफ्नो उम्मेदवारी घोषणा गरेकी हुन्। २०७४ को निर्वाचनमा सोही क्षेत्रबाट माननीय रेशम चौधरीले अत्यधिक मतका साथ प्रतिनिधि सभाको निर्वाचन विजयी हुनुभएको थियाे ।
