टीकापुर/नगरिक उन्मुक्ति पार्टीले संघ र प्रदेश सभा सदस्यकालागि कुनै दल संघ तालमेल र गठबन्धन नगर्ने जनाएको छ । नागरिक उन्मुक्ति पार्टीका प्रवक्ता दामोदर पण्डितले कुनै पनि दलसँग गठबन्धन वा चुनावी तालमेल नगरी निर्वाचनमा भाग लिने बताउनु भएको हाे ।
पार्टी प्रवक्ता दामोदर पण्डितले ‘कैलालीको हकमा ठोस रुपमा हामी अगामी चुनावमा एक्लै जाने भन्नेमा छौं । बाहिर बाहिर कसले के भन्छ त्यसको कुनै अर्थ हुँदैन’ पण्डितले भने, ‘कसैसँग सहकार्य नगर्ने भन्ने नै छ । अरु जिल्लामा भने दुवै पक्षलाई लाभ पुग्ने अवस्था भए गठबन्धन वा तालमेल नकार्न सकिंदैन ।’
उहांका अनुसार कैलालीमा अहिलेसम्म कुनै पनि दलबाट आधिकारीक रुपमा सहकार्यको प्रस्ताव पनि आएको छैन ।प्रतिनिधि सभाका पाँच र प्रदेश सभाका १० वटै निर्वाचन क्षेत्रमा उम्मेदवारी दिने तयारी भइरहेको प्रवक्ता पण्डितको भनाइ छ ।
कैलालीमा स्थानीय तहको निर्वाचन जस्तै प्रदेश र प्रतिनिधि सभामासमेत नागरिक उन्मुक्ति पार्टी पहिलो दल बन्ने दाबी उहांको छ । प्रतिनिधिसभामा चार सिट ल्याउने उहांले जिकिर गर्नुभयाे । स्थानीय तह निर्वाचनमा जितेका पालिकाको संख्यालाई आधार मान्ने हो भने नागरिक उन्मुक्ति पार्टी जिल्लाको पहिलो दल हो ।
गत ३० वैशाखमा भएको स्थानीय तह निर्वाचनमा नागरिक उन्मुक्ति पार्टीले जिल्लाका पूर्वी क्षेत्रका चार पालिका जितेर पहिलो दल बनेको थियाे ।
बलियो देखिएको १ नम्बर क्षेत्रबाट पार्टीका अध्यक्ष समेत रहेकी रञ्जिता श्रेष्ठ चाैधरी उम्मेदवार बन्ने पक्का पक्कि नै छ । क्षेत्र नम्बर १ मा टीकापुर नगरपालिका, जानकी गाउँपालिकाका ५ वडा, भजनी नगरपालिकाका २ वडा र जोशीपुर गाउँपालिका पर्छन् ।
कुल एक लाख २ सय २३ मतदाता रहेको यो निर्वाचन क्षेत्रमा स्थानीय तहको निर्वाचनमा नागरिक उन्मुक्ति पार्टीले वडाध्यक्षमा सबैभन्दा बढी १७ हजार १ सय ९३ मत पाएको थियाे । २०७४ सालमा सांसद रेशम चौधरीले चुनाव जितेको क्षेत्र, थारु बाहुल्यता, नयाँ मतदाताको प्रभाव लगायतका कारण गठबन्धन हुँदासमेत यो क्षेत्र नागरिक उन्मुक्ति पार्टीले जित्ने दाबी गरेको छ ।
