धनगढी,८ मंसिर/धनगढी को एक सामुदायिक वनका सचिव पक्राउ परेका छन् । उपमहानगरपालिकाको एक सामुदायिक वनका सचिवलाई काठ चोरीको अभियोगमा सव डिभिजन वन कार्यालय फूलबारीले पक्राउ गरेको छ । उपमहानगरपालिकाको वडा नम्बर १५ उर्माको शिव दर्शन एकता सामुदायिक वनका सचिब गया प्रसाद रानालाई पक्राउ गरिएको हो ।
काठको गोलिया चोरी गरेको अभियोगमा मंसिर ४ गते पक्राउ गरि वन कार्यालयको हिरासतमा राखिएको सव डिभिजन वन कार्यालय फूलबारीका प्रमुख लोकराज दाहालले जानकारी दिए । उनले मंसिर ४ गते फूलवारी सव डिभिजनका कर्मचारीले रानालाई घरमा लुकाई छिपाई राखेको अवस्थामा १४ फिट लम्बाईको सालको गोलिया सहित पक्राउ गरि छानविनको लागि हिरासतमा राखेको बताए । रानालाई काठ चोरीको अभियोगमा पक्राउ गरि थप अनुसन्धान भइरहेको दाहालको भनाई छ ।
तर सोही सामुदायिक वनका अध्यक्ष पर्शुराम रानाले सचिवले काठ चोरी गरेको भन्ने कुरा गलत भएको बताए । उनले सचिब रानाको घरमा कोही नभएको बेला उनलाई फसाउने हिसावले रातीको समयमा अरु कसैले नै काठ लुकाएको बताए । सो दिन सचिब राना घरमा नभएको बताउँदै अध्यक्ष रानाले काठ चोरी गरेर चोरले सचिब घर पछाडि लुकाएको बताए ।
