टीकापुर/टीकापुर नगरपालिकाका पूर्व वडा अध्यक्ष कालुसिंह कडायतको निधन भएको छ । कडायतको ६६ वर्षको उमेरमा मंगलबार निधन भएको हो । मंगलबार विहान पेट दुख्यो भनेर टीकापुर अस्पतालमा उपचारका लागि जानु भएका कडायतको अकस्मात निधन भएको हो ।
लामो समय शिक्षण पेशामा रहनु भएका कडायत २०५४ सालको स्थानीय निकायको निर्वाचनमा टीकापुर नगरपालिका वडा नम्बर ९ (हाल वडा १) को वडा सदस्यमा निर्वाचित हुनु भएको थियो । तत्कालिन वडा अध्यक्ष सूर्यचन्द्र भट्टराई जिल्ला विकास समितिको क्षेत्रीय सदस्यमा उम्मेदवार बनेपछि कडायतले चार वर्षसम्म कार्यवहाक वडा अध्यक्षको रुपमा काम गर्न भएको थियो ।
भट्टराईले ‘कडायत एक इमान्दार, लगनशील, खरो स्वभाव भएका र सामाजिक काम योगदान पुर्याउनु भएको व्यक्तित्व’का रुपमा स्मरण गर्नुभएको छ ।
कडायत नेकपा एमालेको टीकापुर नगरकमिटि, कैलाली जिल्ला कमिटि सदस्य पनि हुनुहुन्थ्यो । सादगीपूर्ण जीवन र सरल स्वभावका कारण कडायत समाजका प्रिय हुनुहुन्थ्यो ।
कडायतको शवलाई टीकापुर नगरपालिका वडा नम्बर १ ब्लक नम्बर १० स्थित घरमा राखिएको र बुधबार कर्णाली नदीस्थित दौलतपुर घाटमा अन्तिम संसकार गर्ने तयारी भएको परिवारजनले जानकारी दिएका छन् । स्वर्गीय कडायत अछाम जिल्लाको मेल्लेख गाउँपालिका वडा नम्बर १ गवानीमा जन्मिनु भएको हो ।
