धनगढी/सुदूरपश्चिम प्रदेश सरकारका युवा , महिला तथा बालबालिका मन्त्रालयका मन्त्री ओम बिक्रम भाटलाई एक युवाले प्रश्न गरे “के तपाईले प्रसव पिडा सहन गर्नु भएको छ ?” उनले प्रश्नमा थपे “महिलाका पिडाहरु, सवालहरु, र उनिहरुका मुद्धाहरु पुरुषले कसरी सम्बोधन गर्न सक्छ ? समाबेशीताका कुरा गर्नु हुन्छ, महिला मन्त्री त महिला नै हुनुपर्ने पाउनुपर्ने होईन र के तपाई अवसरवादी हो ?”
उक्त प्रश्न एकाउण्टबिलिटी ल्याब नेपालले सोमबार धनगढीमा आयोजना गरेको ‘राजनीतिमा युवाको पहुँच र सहभागीता’ विषयक प्यानल छलफलमा सहभागीका रुपमा उपस्थित भएका पाण्डव पुजाराले गरेका थिए । प्यानल छलफलमा राजनीतिमा समावेशीकरणको बिषय उठान भएपछि प्रश्नकर्ता पुजाराले उक्त प्रश्न सोधेका थिए ।
पुजाराको प्रश्नको जवाफ दिदै सुदूरपश्चिम प्रदेशका युवा महिला तथा बालबालिका मन्त्रालय मन्त्री ओमविक्रम भाटले भने “महिलाका मुद्धाहरु महिला भन्दा पुरुषलाई बढी थाहा हुन्छ । आफुलाई प्रत्यक्ष रुपमा महशुस नगरेपनि हामीले अप्रत्यक्ष रुपमा पुरुषले पनि महशुस गरिरहेका हुन्छन् । जो मैले पनि महशुस गरेको छु ।”साथै मन्त्रीभाटले उनले मन्त्रालय अन्र्तगतका आवश्यक नीति निर्माण गर्ने कुरामा लागीरहेको बताए ।
एकाउण्टबिलिटी ल्याब नेपालले आयोजना गरेको कार्यक्रममा राजनीतिज्ञ, नागरिक समाज, पत्रकार, विद्यार्थी गरी ५० भन्दा बढी युवाहरुको सहभागीता रहेको थियो । प्यानल छलफलमा नेपाली काँग्रेसका महाअधिवेसन प्रतिनिधी सुनिता राना, धनगढी उपमहानगरपालिका वडा नम्बर १८ का वडाध्यक्ष भुवन रिजाल, र युवा नेता विनय शाह उपस्थित थिए ।
