हिन्दु नेपालीहरुको महान चाड वडा दशैं तथा शुभ दिपावली एकपटक फेरि घरआँगनमा आइपुगेको छ । वडादशैं तथा तिहार नेपालीहरुका लागि धार्मिक चाड मात्रै होइन, यो सांस्कृतिक र सामाजिक पर्व पनि हो ।
वडादशैं असत्यमाथि सत्यको विजयको प्रतिक पनि हो । आसुरी शक्तिमाथि दैवीशक्तिको विजयको प्रतिक हो । वडादशैं मनाइरहँदा नौ दिन सम्म आदिशक्ति माता भवानीका नौ रुपको बडो भक्तिभावपूर्वक पुजा आजा हुने गर्दछ ।
दशैका नौ दिन सम्म हरेक आसुरी शक्तिलाई देवी भगवतिले एकएक गरेर संहार गरेको गाथा स्मरण गरिन्छ । महिषासुर, चण्डमुण्ड, रक्तवीज, लगायतका असरहरुको संहारको रोमाञ्चक कथा स्मरण गरिन्छ ।
विभिन्न कालखण्डमा विभिन्न रुप धारण गरेर आसुरी शक्तिहरुको नाश गर्दै भक्तजनहरुको रक्षा गरेको गाथा स्मृतिमा आउने गर्दछ ।
चाडबाडमा जे सुकै विकृत संस्कृति र गतिविधि भित्राए पनि यी चाडपर्वको मुल धार्मिक, सांस्कृतिक तथा सामाजिक महत्व र पक्ष कहिल्यै कमजोर हुँदैन । किनकि यी चाडपर्व हामी नेपालीहरुको विशिष्ट मौलिक परिचय हो ।
त्यसैले दशैं तिहारका बारेमा विभिन्न कोणबाट टिकाटिप्पणी हुंदै आए पनि नेपाली समाजमा यी चाडपर्व प्रतिको आकर्षण तथा विश्वास कहिल्यै पनि रत्तीभर पनि कमी आएको छैन । माता भवानीले तपाई हामी सबैको भलो गरुन् वडादशैं २०७८ को पावन अवसरमा देश भित्र र बाहिर रहेका सबै नेपाली दिदी बहिनी दाजु भाईहरुमा मंगलमय शुभकामना ।
