सुखड/गत बैशाखमा भएको स्थानीय तहको निर्वाचनमा विजयी पश्चात् घोडाघोडी नगरपालिका प्रमुख खडक बहादुर रावतले धनगढीमा बस्दै आएकी आफ्नी कान्छी श्रीमतीलाई घोडाघोडीमा ल्याउन खेलेको सेटीङ्ग नै कोल्ड चेन काण्ड हो । उनले आफु विजयी भए लगतै २०७९ जेठ महिनाको दोस्रो साता नै कान्छी श्रीमतीलाई घोडाघोडी ल्याएका थिए ।
नगरप्रमुख रावत आजका मिति सम्म पनि कान्छी श्रीमती सहित भाडाको घरमा बस्दै आएका छन् । तर, नगरप्रमुख परिवार सहित बस्दै आएको घरभाडा भने, घोडाघोडी नगरपालिकाले नै तिर्दै आएको छ ।
जुन कार्य स्थानीय सेवा गठन तथा संचालन ऐन,२०७९ विपरीत रहेको छ । यस ऐनमा स्थानीय तहका जनप्रतिनिधिलाइ आवास सुविधा प्रदान गरिएको छैन । अझ स्थानीय तहका पदाधिकारी तथा सदस्यहरुले प्राप्त गरेका सुविधाहरुको विवरण तीन–तीन महिनाको अन्तरालमा सम्बन्धित स्थानीय तहले नै सार्वजनिक गर्नु पर्ने हुन्छ ।
तर, घोडाघोडीका नगरप्रमुख रावतको हकमा त्यो पनि लागुभएको पाईदैन । सुविधा सहितको कोल्ड चेनमा बस्ने सर्तमा नगरप्रमुख रावतले कान्छी श्रीमती यमुना रावतलाई धनगढीबाट कोल्ड चेनमा सारेका हुन । जहाँ नगरप्रमुख रावतकी श्रीमतीले फुर्सदको समय निकाल्दै, बेलाबेलामा टिकटक बनाएर सामाजिक संजलमा समेत डाउनलोड गर्ने गरेकी छन् ।
सामान्यतया कोल्ड चेनले ताजा कृषि उत्पादन, समुन्द्री खाना, फ्रोजन फूड, फोटोग्राफिक फिल्म, केमिकल र औषधि जस्ता सामानहरूको तापमान–नियन्त्रण तथा त्यस्ताबास्तुको गुणस्तर सुनिश्चित गर्ने कार्य गर्दछ । कैलालीको घोडाघोडी नगरपालिकाले घोडाघोडी–१०, मा औषधि तथा भ्याक्सिन जस्ता उपभोग सम्म नाश हुने वस्तुहरूको अखण्डता र गुणस्तरको संरक्षण गर्ने उदेश्यले स्थानीय भिष्म बहादुर बंमको घरको चौथो तला भाडामा लिएको छ । गएको २१ महिना देखि मासिक १३ हजार पाँच सय रुपैंयाका दरले नगरपालिकाले आफुलाई तिर्दै आइरहेको घरधनी बंमले बताएका छन् । सम्झौता पत्रमा भने, कोल्ड चेन कार्य परियोजनका लागी लेखिएको भएपनि उक्त घर भाडामा लिए देखिनै नगरप्रमुख रावतको स–परिवार सो घरमा बस्दै आईरहेका छन् ।
यस सम्बन्धमा घोडाघोडी नगरपालिका प्रमुख रावतलाई बुझ्न् खोज्दा उनको मोबाइल अफ थियो भने, उनकी श्रीमतीको जवाफ “मैले तिर्दैन, यस विषयमा मेयरलाई नै सोध्नु होला ? कताबाट तिर्छन ।” भन्ने ठाडो जवाफ आएको थियो ।
नगरप्रमुख बस्दै आएको घरको भाडा नियमित रुपमा नगरपालिकाले हाल्ने गरेको भएपनि कस्को पालामा र कुन परियोजनका लागी घर भाडामा लिइएको हो । आफुलाई कुनै जानकारी नभएको घोडाघोडी नगरपालिका निमित्त कार्यालय प्रमुख खगेन्द्र बहादुर सिंहको भनाई छ ।
