नगरबासीको घरबाट फोहर उठाईरहेको धनगढी उप–महानगरपालिकाले त्यसलाई बस्तीका बिचमा रहेका नाला र खोल्साहरुमा फाल्ने गरेको छ ।
उप–महानगरपालिकाले नगरबासीको घरबाट शुल्क असुलेर फोहर उठाउने गर्दछ । घरबाट फोहरको बर्गिकरण गर्ने कुरालाई कडाई रहेको नगरपालिकाले नकुहिने र प्लाष्टिक जन्य फोहर नगरकै खोला र खोल्साहरुमा फाल्ने गरेको छ । कुहिने फोहर चाहि वडा नं २ मा रहेको ग्याँस प्लान्टमा लैजाने गरेको उप–महानगरपालिका सहसफाई शाखाका कर्मचारीहरु बताउँछन् । यस अघि वडा नं १ मा रहेको सिताराम डेरी पछाडीको नाला, त्यसपछि वडा नं वडा नं ६ जाली नालामा फोहर फाल्दै आएको उप–महानगरपालिकाले अहिले कैलाली बहुमुखी क्याम्पसको पछाडी रहेको खोल्सामा फाल्दै आएको छ । फोहर फाल्ने निश्चीत ठाउँ नहुदा खोला, नाला र खोल्साहरुमा फोहर फालिएको सरसफाई शाखाका कर्मचारीहरु बताउँछन् ।
खुला ठाउँमा फोहर फाल्दा बस्ती नै दुर्गन्धीत बनेको छ । स्थानीयको गुनासो त्यहाँ पुगेको सञ्चारकर्मीहरुको टोलीले फोहर यत्रतत्र छरिएको अवस्था फेला पारेको थियो । स्थानीयले खाल्टो पुरिदिने सर्तमा आफुहरुले फोहर फाल्न दिएको बताएका छन् । फोहर छोप्नका लागि उप–महानगरपालिकाले ट्रिपरमा माटो पठाउने भनेको छ , स्थानीय नरेन्द्र ऐडीले भने,‘फोहर छोप्न आजै माटो आउन सक्छ ।” खाल्टो पुरिएला भनेर आफुहरुले फोहर फाल्न दिएको पनि ऐडिले बताए । खाल्टो पुर्नकै लागि फोहर फाल्न दिनु आफुहरुको बाध्यता रहेको टोलबासीले बताएका छन् । जाली नालामा फालेको फोहरले अहिले पनि बस्ती दुर्गन्धीत रहेको गुनासो गरेका छन् ।
कुकुरले फोहर तानेर घरको आगन सम्म नै पु¥याउने गरेको गुनासो छ । सामान्य हावा चल्दा पनि प्लाष्टिक उडेर यत्रतत्र छरिने गरेको छ । धनगढी उप–महानगरपालिकामा प्लाष्टिकका झोलाहरु प्रयोगमा प्रतिवन्ध लगाएको छ । प्लाष्टिक जलाएको पाईएमा जरिमाना काट्ने गरेको पनि छ । तर आफै उप–महानगरपालिका प्लाष्टिक जन्य फोहर बस्तीका बिचमा रहेका खोला, नाला र खोल्सामा फालिरहेको छ ।
धनगढी उप–महानगरपालिकाका डिभिजनल इन्जिनियर दिजराज भट्टले धनगढीको फोहर ब्यबस्थापन गर्न वडा नं ७ मा रहेको पटेला एकिकृत फोहर ब्यबस्थापन केन्द्र ( लेन्डफिल) बनाउन टेन्डर भएको भएपनि फाईल बन मन्त्रालयमा गएर रोकिदा काम अगाडी बढ्न नसकेको बताए ।
यस्तो छ , एकिकृत फोहर ब्यबस्थापन केन्द्रको नालिबेली ः
क्षेत्रीय शहरी विकास आयोजनाको सहयोगमा धनगढी उप–महानगरपालिका वडा नं २ मोहना नदी किनारमा एकिकृत फोहर ब्यबस्थापन केन्द्र निर्माणको प्रकृया अन्तीम चरणमा पुगेको थियो । जग्गाको मुआब्जा समेत बुझ्ने तयारीमा जग्गाधनीहरु थिए ।
एकिकृत फोहर ब्यबस्थापन केन्द्र वडा नं २ मा निर्माण हुने भएपनि वाटो वडा नं १ भएर जाने भएपछि त्यसको बिरोध वडा नं १ बाट भयो । स्थानीयलाई एकिकृत फोहर ब्यबस्थापन केन्द्रको बारेमा बुझाउन, तत्कालिन नगरप्रमुख नृपबहादुर वडले निकै मेहनत गरेका थिए । स्थानीयलाई एकिकृत फोहर ब्यबस्थापन केन्द्र बनेका ठाउँमा अवलोकन भ्रमण समेत गराएका थिए । जे गर्दा पनि वडा नं २ मा एकिकृत फोहर ब्यबस्थापन केन्द्र निर्माण हुन सकेन । आफुलाई असफल देखाउन एक दुई जना ब्यक्तिले स्थानीयमा भ्रम फैलाएको र आफ्नो नजिकको मिडिया प्रयोग गरेर निर्माण हुन नदिने वातावरण बनाएको स्वयं पूर्व नगरप्रमुख वडले बताउदै आएका थिए ।
एकिकृत फोहर ब्यबस्थापन केन्द्र निर्माण नहुदा त्यसको प्रभाव क्षेत्रीय सहरी विकास आयोजनामा पर्ने हुदा तत्कालीन नगरप्रमुख वड निकै दवावमा थिए । त्यसपछि उनले वडा नं १० घुईयाघाटको पछाडीको क्षेत्रमा जग्गा हेरेका थिए ।
त्यहाँ पनि हुन नसके पछि वडा नं ७ पटेलामा एकिकृत फोहर ब्यबस्थापन केन्द्र निर्माणको प्रयास गरिएको पूर्व नगरप्रमुख वड बताउँछन् । तत्कालीन वडा नं ७ का वडा अध्यक्ष सिताराम राना, वडा नं ७ का वडा सदस्यहरु, डिभिजनल इन्जिनियर डिजराज भट्ट लगायतका ब्ययक्तिको निरन्तरको प्रयास पछि एकिकृत फोहर ब्यबस्थापन केन्द्र निर्माण गर्न दिन पटेलाबासी सहमत भएको तत्कालिन नगरप्रमुख वड बताउँछन् । त्यसपछि वातावरणिय प्रभाव अध्ययन गरेर टेन्डर प्रकृयाको तयारी गर्दैगर्दा कार्यकाल सकिएको वड बताउँछन् ।
अहिले वडा नं ७ मा रहेको पटेलामा एकिकृत फोहर ब्यबस्थापन केन्द्र ( लेन्डफिल) बनाउन टेन्डर भएको भएपनि फाईल बन मन्त्रालयमा गएर रोकिदा काम अगाडी बढ्न सकेको छैन
