टीकापुर/सांसद रेशम लाल चाैधरीको नयाँ दल नागरिक उन्मुक्ति पार्टी दर्ता गरिएको छ ।
मंगलबार रेशम लाल चाैधरीकाे श्रीमती रन्जिता श्रेष्ठ चाैधरीकाे नेतृत्वमा २५ सदस्यीय नयाँ दल ‘नागरिक उन्मुक्ति पार्टी’ नाम दिइ दर्ता भएको हाे । नयाँ दलमा विभिन्न पार्टीबाट विजयी वडा अध्यक्ष, कार्यपालिका सदस्य र वडा सदस्यहरु पार्टीमा आवद्ध भएका छन् ।
नयाँ दल नागरिक उन्मुक्ति पार्टीमा २०१ जनाको केन्द्रीय सदस्य रहने व्यवस्था राखिएको छ । नयाँ दर्ता भएको पार्टीको चुनाव चिन्ह ढकिया राखिएकाे छ । त्यसैगरी पार्टीको आधारभूमिका रुपमा थरूहट क्षेत्र रहने उल्लेख छ । यद्यपि यो पार्टी राष्ट्रिय सोचका साथ राष्ट्रिय पार्टीका रुपमा खोलिएको दस्तावेजमा उल्लेख छ । पार्टीमा सक्रिय राजनीतिको उमेर हद ६५ वर्ष कायम गरिएको छ ।
पार्टीमा एकजना अध्यक्ष, ७ जना उपाध्यक्ष, तीनजना वरिष्ठ नेता, एक महासचिव, ७ जना सचिव, एक कोषाध्यक्ष र ७ जना सह कोषाध्यक्ष रहने ब्यवस्था रहेको छ ।
त्यसैगरी नयाँ पार्टीको शासकीय स्वरुपमा संघीयता, धर्म निरपेक्षता, जनताबाट प्रत्यक्ष निर्वाचित प्रधानमन्त्रीको व्यवस्था गरिने उल्लेख गरिएको छ । त्यसैगरी दलित जनजाति, थारु, मुस्लिम महिलाका लागि अनिवार्य आरक्षित सिटको व्यवस्था गरिने उल्लेख छ।
