सुखड/आगामी फागुन २१ गते हुने प्रतिनिधिसभा सदस्य निर्वाचनका लागि कैलाली निर्वाचन क्षेत्र नम्बर–३ बाट नेपाली काँग्रेसका उम्मेदवार भीम बडूवाल काँग्रेसका अनुभवी, सङ्घर्षशील तथा विकासमुखी नेता हुन् ।
बिपी कोइरालाको लोकतान्त्रिक विचारधाराबाट प्रभावित बडूवाल विद्यार्थी जीवनदेखि नै राजनीति र सामाजिक सेवामा सक्रिय रहँदै आएका छन् । प्रजातन्त्र, लोकतन्त्र र नागरिक अधिकारका पक्षमा भएका हरेक आन्दोलनमा उनको सक्रिय सहभागिता रहँदै आएको छ ।
उनको औपचारिक राजनीतिक यात्रा वि.सं. २०५० सालमा रघुनाथ आदर्श माध्यमिक विद्यालयमा अध्ययनरत रहँदा नेपाल विद्यार्थी सङ्घ (नेविसंघ)को इकाई सचिव बनेसँगै सुरु भएको हो । सङ्गठन निर्माणमा कुशल बडूवाल वि.सं. २०५२ सालमा नेपाल विद्यार्थी सङ्घ कैलाली निर्वाचन क्षेत्र नम्बर–२ को क्षेत्रीय सभापतिमा निर्वाचित भए ।
त्यसपछि वि.सं. २०५५ सालमा नेविसंघ कैलालीको कोषाध्यक्ष र वि.सं. २०५९ सालमा जिल्ला सभापतिको जिम्मेवारी सम्हाल्दै उनले विद्यार्थी राजनीतिमा बलियो नेतृत्व स्थापित गरे ।
विद्यार्थीहरूको हक–हितका सवालमा स्पष्ट र बुलन्द आवाज उठाउने प्रखर वक्ताका रूपमा परिचित बडूवाल वि.सं. २०६५ सालमा नेपाल विद्यार्थी सङ्घ केन्द्रीय समितिको सह–महामन्त्री बने । सो अवधिमा उनले सङ्गठन विस्तार, आन्दोलनको नेतृत्व तथा नीति निर्माणमा सक्रिय भूमिका निर्वाह गरे ।
विद्यार्थी राजनीतिपछि पनि पार्टी सङ्गठनमा निरन्तर सक्रिय रहँदै आएका बडूवाल वि.सं. २०६२, २०६७ र २०६८ का महाधिवेशनमा प्रतिनिधि तथा महासमिति सदस्य बने । वि.सं. २०६७ सालमा नेपाली काँग्रेस कैलालीको जिल्ला सचिव र वि.सं. २०७२ सालमा जिल्ला सभापतिमा उम्मेदवारी दिएका उनले हार–जितभन्दा माथि उठेर पार्टी र सङ्गठनको सेवामा निरन्तर योगदान पु¥याउँदै आएका छन् ।
वि.सं. २०७८ सालमा उनी नेपाली काँग्रेस कैलालीको जिल्ला उप–सभापतिमा निर्वाचित भएका हुन् ।
राजनीतिसँगै सामाजिक सेवामा समेत गहिरो योगदान दिएका बडूवालले वि.सं. २०६७ सालमा घोडाघोडी ग्रामीण विद्युत् सहकारी संस्थाको अध्यक्षको रूपमा साबिक साडेपानी, दरख, रामशिखरझाला, मसुरिया र उदासीपुरका करिब १२ हजार घरधुरीमा विद्युत् सेवा पु¥याउन नेतृत्वदायी भूमिका खेले ।
उनको नेतृत्वमा ती बस्तीहरू अन्धकारमुक्त बन्न सफल भए, जसलाई उनको जीवनको महत्त्वपूर्ण उपलब्धिका रूपमा लिइन्छ । शैक्षिक रूपमा समेत सुदृढ बडूवालले त्रिचन्द्र क्याम्पस, काठमाडौँबाट स्नातक (बी.ए.) अध्ययन पूरा गरेका छन् । त्यसपछि त्रिभुवन विश्वविद्यालयबाट राजनीति शास्त्रमा स्नातकोत्तर तथा नेपाल ल क्याम्पसबाट कानुनमा एल.एल.बी. उपाधि हासिल गरेका छन् ।
शिक्षा, राजनीति र कानुनको ज्ञानले उनलाई नीति निर्माण र जन पक्षीय वकालतमा सक्षम बनाएको छ । विद्यार्थी आन्दोलनबाट खारिएका, सङ्गठन निर्माणमा दक्ष, विकासमा परिणाम देखाइसकेका तथा जनताको आवाज संसदमा मजबुत रूपमा उठाउन प्रतिबद्ध भीम बडूवाल आज कैलाली क्षेत्रका एक भरोसायोग्य र अनुभवी राजनीतिक व्यक्तित्वका रूपमा चिनिन्छन् ।
