सुखड । कैलालीको घोडाघोडी नगरपालिका–३ सृष्टिनगर मुक्त कमैया बस्तीका नागरिकलाई सुरक्षित आवास हस्तान्तरण गरिएको छ । सीमान्तकृत वर्गका १२ परिवारलाई मङ्गलवार सुरक्षित आवास हस्तान्तरण गरिएको हो । घोडाघोडी नगरपालिकाका नगर प्रमुख खडक बहादुर रावतले ती परिवारहरूलाई मङ्गलवार एक कार्यक्रमबिच आवास हस्तान्तरण गर्नुभएको हो ।
सृष्टिनगर मुक्त कमैया बस्तीमा दुई वटा पक्की कोठा र शौचालय सहित १२ वटा आवास रहेका छन् । निमार्ण गरिएको घर पाएपछि त्यहाँका सीमान्तकृत वर्गका समुदाय खुसी भएका छन् । वडा नम्बर ३ को विशेष समन्वयमा घोडाघोडी नगरपालिकाको ४२ लाख, सुरक्षित आवास परियोजना ह्याविट्याट/राष्ट्रिय दलित नेटवर्क नेपाल बाट २४ लाख रुपैयाँको लागतमा सुरक्षित आवास निर्माण गरिएको हो ।
कार्यक्रममा नगर प्रमुख खडक बहादुर रावतले विपन्न समुदायको उचित बसोबासका लागि आवास निमार्णका साथै शिक्षा, स्वास्थ्य, खानेपानी, तथा सिँचाई जस्ता सम्पूर्ण क्षेत्रहरूमा प्रमुख प्राथमिकताका साथ नगरपालिकाले काम गरेको उनले उल्लेख गरे । निस्सा पाएका सुकुम्वासी, दलित परिवारलाई चाँडै लालपुर्जा दिने समेत उनले बताए छन् । अन्य वडामा पनि मुक्त कमैया बस्तीका नागरिकलाई सुरक्षित आवास निर्माण गरिने उनको भनाई थियो ।
कार्यक्रममा उप प्रमुख गुलिया कुमारी चौधरीले सुकुम्वासी, आदिवासी र पिछडा समुदायको जीवन स्तर उकास्न नगरपालिका लागी परेको उनले बताउनु भयो । पालिकाले सीपमूलक स्वरोजगार कार्यक्रम ल्याएको बताउँदै उप प्रमुख चौधरीले यसको माध्यमबाट उत्पादन स्वरोजगारमा अगाडी बढाउने उहाँको भनाई रहेको थियो ।
सुरक्षित आवास हस्तान्तरण कार्यक्रममा नगर प्रमुख,उप प्रमुख, प्रमुख प्रशासकीय अधिकृत, वडा अध्यक्ष, वडा सदस्य, विभिन्न राजनीतिक दलका प्रतिनिधि, हयाविटयाट् नेपाल प्रतिनिधि, राष्ट्रिय दलित नेटवर्कका प्रतिनिधि र लाभग्राही समुदायका उपस्थिति रहेको थियो ।
