धनगढीको मोहना नदी क्षेत्रको कटानी रोक्नका लागि २० हेक्टर क्षेत्रमा ३२ हजार बिरुवा रोपिन थालको छ । शनिबार डिभिजन वन कार्यालय धनगढीका बरिष्ठ वन अधिकृत कृष्णदत्त भट्टले बिरुवा रुपेर शुभारम्भ गरेका हुन् ।
धनगढी उपमहानगरपालिका–३ र १३ मा अवस्थित डिलासैनी शिव मन्दिर सामुदायिक वन उपभोक्ता समूह क्षेत्रभित्रको बगर क्षेत्रमा वृक्षारोपण गरिएको छ। डिभिजन वन कार्यालय कैलाली सहर्काय र नेचर नेक्सस नेपालको आयोजनामा वृक्षारोपण गरिएको हो।
वन क्षेत्रभित्र खाली जमिनलाई हराभरा बनाउने उद्देश्यले वृक्षारोपण गरिएको डिभिजन वन कार्यालयका प्रमुख कृष्णदत्त भट्टले बताए । “वृक्षारोपणले नदी कटान रोकथाममा सहयोग पुग्नेछ, साथै वातावरणीय सन्तुलन कायम गर्न पनि यो महत्त्वपूर्ण छ,” उनले भने। डिलासैनी सामुदायिक वनका अध्यक्ष कृष्णसिंह ऐरले सामुदायिक वनभित्रका खाली जमिनमा २० हेक्टर क्षेत्रफलमा वृक्षारोपण गर्ने योजना रहेको बताए।
“मोहना नदीको कटान हुने क्षेत्रलाई पनि मध्यनजर गर्दै बिरुवा लगाइएको हो ३२ हजार बढी विरुवा रोप्ने योजना छ ,” उनले भने, “आगामी दिनमा नर्सरी उत्पादन गरेर बाँझो जमिनमा थप वृक्षारोपण गरिनेछ।” लगाइएका बिरुवाको संरक्षणका लागि अस्थायी बाँध निर्माण गर्ने र नियमित हेरचाहको व्यवस्था मिलाउने उनले बताए ।
नेचर नेक्सस नेपालका निर्देशक वीरेन्द्र बिष्टले वृक्षारोपणले वातावरण संरक्षणमा मात्र नभई जनचेतना फैलाउने काममा पनि सहयोग पुग्ने बताए। “जति सकिन्छ खाली जमिनमा वृक्षारोपण गर्नुपर्छ, त्यसले वातावरण सन्तुलन कायम हुन्छ,” उनले भने।
सो वनमा गरिएको अनुसन्धानका क्रममा थुप्रै खाली क्षेत्र फेला परेकोले यसमा वृक्षारोपण गर्ने योजना बनाएको उनले बताए। जलवायु परिवर्तनको असर न्यूनीकरण गर्न वृक्षारोपण एक भरपर्दो उपाय भएको भन्दै उनले जैविक विविधता संरक्षणका लागि समेत वृक्षारोपण अनिवार्य रहेको बताए।
