धनगढी, असार १३/सुदूरपश्चिम प्रदेशका मुख्यमन्त्री कमलबहादुर शाहले नागरिक र राज्यको सुरक्षा सुनिश्चित गर्न सरोकारवाला सबै निकाय जिम्मेवार बन्नुपर्ने बताउनुभएको छ।
शनिबार धनगढीमा आयोजित ‘सुदूरपश्चिम प्रदेशस्तरीय अपराध अनुसन्धान समीक्षा गोष्ठी’ को उद्घाटन गर्दै मुख्यमन्त्री शाहले नागरिकको जिउधन र राज्यको सुरक्षाका लागि सरकार, सुरक्षा निकाय, न्यायपालिका तथा सञ्चार क्षेत्रबीच प्रभावकारी समन्वय र सहकार्य आवश्यक रहेकोमा जोड दिनुभयो।
उहाँले राज्यका सम्पूर्ण निकाय एकअर्काका परिपूरक भएकाले आपसी समन्वय र सहकार्यबाट मात्र प्रभावकारी नतिजा हासिल गर्न सकिने बताउनुभयो।
“राज्यका सम्पूर्ण निकायहरू एकअर्काका परिपूरक हुन्। राज्यका सबै निकायबीच समन्वय र सहकार्य भयो भने मात्रै प्रभावकारी नतिजा हासिल गर्न सकिन्छ,” मुख्यमन्त्री शाहले भन्नुभयो।
जनताको सुरक्षालाई केन्द्रविन्दुमा राखेर काम गरे मात्र नागरिकको विश्वास जित्न सकिने उल्लेख गर्दै उहाँले सरकार र नेपाल प्रहरीबीचको सहकार्यलाई अझ सुदृढ बनाउनुपर्ने आवश्यकता औँल्याउनुभयो।
मुख्यमन्त्री शाहले अपराध अनुसन्धानका क्षेत्रमा देखिएका कमजोरी सुधार गर्दै प्रदेशभर एकरूप कार्यशैली विकास गर्नुपर्नेमा जोड दिनुभयो। नेपाल प्रहरीको अनुसन्धान प्रणालीलाई अझ प्रभावकारी, व्यावसायिक तथा नतिजामुखी बनाउन स्पष्ट रणनीति तय गरी त्यसको प्रभावकारी कार्यान्वयन गर्नुपर्ने उहाँको भनाइ थियो।
