महिलाहरूको दिगो जीविकोपार्जन पहुँच वृद्धि परियोजनाअन्तर्गत व्यवसाय विस्तारका लागि प्राविधिक तथा सामग्री हस्तान्तरण कार्यक्रम सम्पन्न भएको छ। कार्यक्रम मानव अधिकारका लागि एकल महिला धनगढीद्वारा आयोजना गरिएको हो भने आर्थिक सहयोग यूएन वुमन (UN/WOMEN) र सहजीकरण साभास नेपालले गरेका हुन्।
धनगढी उपमहानगरपालिका–४ का वडाध्यक्ष बुद्धि राज खड्का प्रमुख अतिथि रहेका कार्यक्रममा राजबहादुर ऐर, गजेन्द्र शाही र धर्मराज ओझा अतिथि रहेका थिए। यूएन वुमनको सहयोगमा तरकारी खेती, सिलाइ–कटाइ, होमस्टे सञ्चालनलगायत क्षेत्रका महिला उद्यमीलाई सामग्री हस्तान्तरण गरिएको हो।
यूएन वुमनका कार्यक्रम प्रमुख प्रतिभा चौधरीले महिलालाई केवल तालिम दिएर छोड्ने मात्र नभई.उनीहरूलाई आर्थिक रूपमा सबल बनाई आफ्नो आम्दानी र खर्चको निर्णय आफैं गर्न सक्षम बनाउन सहयोग गर्ने उद्देश्य रहेको बताइन्। साथै, उत्पादन भएका वस्तुको बजार व्यवस्थापन, सफलताको कथा सार्वजनिक गर्ने र आगामी दिनमा पनि सहयोग निरन्तर राख्ने प्रतिबद्धता व्यक्त गरिन्।
प्रमुख अतिथि वडाध्यक्ष खड्काले एकल महिलाको साथमा वडा सरकार सधैं रहने, उत्पादन वृद्धि गर्न प्रोत्साहन दिने र आवश्यकता परे मन्त्रालयसम्म समन्वय गर्ने प्रतिबद्धता जनाए। उनले वडा र पालिकाले छुट्टाछुट्टै पनि सहयोग गर्न सक्ने बताए।
