गोदावरी । गोदावरी नगरपालिका वडा नम्बर ९ मुड कट्टीमा रहेको मनकिया सामुदायिक वनले उपभोक्तालाई निशुल्क विद्युतिय चुलो वितरण गरेको छ । सोमबार एक कार्यक्रमका वीच सामुदायिक वनका २५५ उपभोक्तालाई १९ लाख ७७ हजार ५२५ रुपियाँ बराबरका विद्युतिय चुलो,प्रेसर कुकर र कडाई वितरण गरिएको हो ।
वि.स २०५६ सालमा स्थापना भएको मनकिया सामुदायिक वनले वन पैदावार बिक्रीबाट आम्दानी भएको रकमले उपभोक्ताका लागि विद्युतिय चुलो खरिद गरि निशुल्क वितरण गरेको हो । सामुदायिक वनले एसएन्भी नेपालको सहयोगमा चुलो वितरण गरेको हो । विद्युतिय चुलो खरिदमा मनकिया सामुदायिक वनले प्रति चुलो ५ हजार ७५५ का दरले १४ लाख ६७ हजार ५२५ र एसएन्भभि नेपालले एण्डेब
कार्यक्रम अन्र्तगत प्रति चुलो २ हजारका दरले कुल ५ लाख १० हजार सहयोग गरेको छ ।
सामुदायिक वनले धनगढी ७ शक्ति नगरमा रहेको कल्पवृक्ष ग्रेटर गुड्स प्रालिबाट टेण्डर मार्फत् विद्युतीय चुलो खरीद गरेको हो । कल्प वृक्षमा भान्सामा प्रयोग गरिने विद्युतीय सामाग्री साथै महिलाका लागि प्रयोग हुने स्वास्थ्य सामाग्रीहरु पाइने जनाइएको छ ।
एसएन्भी नेपालका एण्डेब व्यवसाय विकास संयोजक रुपक देउवाले जंगलका दाउराको प्रयोगबाट धुवाँ जन्य रोगहरु लाग्ने,वातावरण प्रदुषण हुने,समयमा पानी र अक्सिजन नपाइने भएकाले वन जोगाउन उपभोक्तालाई विद्युतिय चुलो वितरण गरिएको बताए । विद्युतिय चुलो प्रयोग गरेमा वन विनास रोकिने,एलपिजि ग्याँसको प्रयोग कम भइ नेपाली रुपियाँ बच्ने, र नेपाल मै उत्पादन भएको विद्युत खपत हुने भएकाले सबैले विद्युतिय चुलोको प्रयोग गर्नुपर्ने संयोजक खड्काको भनाई छ ।
सामुदायिक वन राष्टिय उपभोक्ता महासंघ नेपालका केन्द्रिय महासचिव डण्डीराज सुवेदीले विद्युतिय चुलोको प्रयोगले बन संरक्षण र वातावरण प्रदुषण नियन्त्रणमा सहयोग पुग्ने बताए ।
कार्यक्रमका प्रमुख अतिथि डिभिजनल वन अधिकृत रामचन्द्र कँडेलले विद्युत्को खपत बढाउने,गृहणी महिलाको स्वास्थ्य र वन संरक्षणका हिसाबले सामुदायिक वनका उपभोक्तालाई विद्युतीय चुलो वितरण गर्नु सराहनीय काम भएको बताए ।
