कैलाली । सहारा क्लब पहलमानपुरको आयोजनामा शनिबार आयोजित बृहत् रक्तदान कार्यक्रममा ५७ पिन्ट रगत संकलन गरिएको छ। क्लबका अध्यक्ष निर्मल कुमार मिश्रले रक्तदान कार्यक्रममा ५७ पिन्ट रगत संकलन भएको जानकारी दिनुभयो।
रक्तदान कार्यक्रमको प्रमुख अतिथिका रूपमा घोडाघोडी नगरपालिकाका प्रमुख खडक रावत रहनुभएको थियो। कार्यक्रममा हिमालयन एभरेस्ट इन्स्योरेन्स प्रालिका सुदूरपश्चिम प्रमुख सागर बम, लायन्स क्लब सुखड तथा सीएस अस्पताल प्रालिका अध्यक्ष विष्णु सापकोटालगायतको सहभागिता रहेको थियो।
रक्तदातालाई रगत संकलन गर्ने थैली प्रदान गर्दै कार्यक्रमको उद्घाटन गरिएको थियो। कार्यक्रममा रक्तदाताहरूलाई सम्मानसमेत गरिएको थियो। रक्तदातालाई सम्मान गर्ने कार्यक्रम संयोजक गणेशबहादुर कठायत रहनुभएको थियो।
कार्यक्रम सफल बनाउन घोडाघोडी नगरपालिका कार्यालय सुखड, हिमालयन एभरेस्ट इन्स्योरेन्स प्रालि, लायन्स क्लब सुखड–घोडाघोडीताल, सीएस अस्पताल प्रालि सुखड, कलम बम मेमोरियल इङ्लिस स्कुल तथा पायोनियर्स स्कलर्स एकेडेमी पहलमानपुरले सहयोग गरेका थिए।
त्यसैगरी, कार्यक्रम व्यवस्थापनमा स्काउट, नेपाल प्रहरी तथा ट्राफिक प्रहरीको स्वयंसेवी सहयोग रहेको थियो। कार्यक्रमको समाचार सम्प्रेषणका लागि उपस्थित पत्रकारहरूप्रति आयोजकले विशेष धन्यवाद व्यक्त गरेको छ।
