स्वास्थ्य तथा जनसंख्या मन्त्रालयले विश्वमै कोरोना भाइरस विरुद्धको खोप (भ्याक्सिन) पत्ता लागि नसकेको बताएको छ । स्वास्थ्य मन्त्रालयका प्रवक्ता डा।जागेश्वर गौतमले विश्वमा हाल कोरोना भाइरसविरुद्ध खोप पत्ता लागिनसकेको बताउनुभएको हो ।
शुक्रबारको नियमित प्रेस ब्रिफिङको क्रममा प्रवक्ता डा. गौतमले भन्नुभयो, ‘भ्याक्सिनको बारेमा हल्ला भइरहेको छ । अहिलेसम्म संसारमा कहिँ पनि भ्याक्सिन निस्केको छैन । फेज थ्री ट्रायल भइरहेको छ, भ्याक्सिनको ।’
भ्याक्सिन बनिसकेपछि नेपाल सरकारकै पहलमा नेपालमा भ्याक्सिन उपलब्ध हुने प्रवक्ता डा. गौतमले जानकारी दिनुभयो । उहाँले थप भन्नुभयो, ‘र, कुनै प्राइभेट कम्पनीसँग बाहिर सम्झौता भएको भन्ने हल्लाहरु पनि बाहिर आएको छ । यी हल्लाहरुको पछाडि नलाग्न सम्पूर्ण सम्बन्धित सबैलाई अनुरोध गर्दछु ।’
केही दिन अगाडि मात्रै रुसले कोभिड–१९ विरुद्धको दुई करोड पचास लाख डोज भ्याक्सिन नेपाललाई दिने भन्ने समाचार सार्वजनिक भएको थियो । जहाँ रुसले पत्ता लगाएको ‘स्पुतनिक–५’ नामक उक्त भ्याक्सिन नेपाल पठाउन सम्झौता समेत भइसकेको बताइएको थियो ।
