धनगढी, १३ साउन / ‘हाम्रो आवाज : चेलीबेटी बेचबिखनबाट मूक्त समाज’ भन्ने मूल नारासहित धनगढीमा आज मानव बेचबिखन तथा ओसारपसार विरुद्धको अन्तर्राष्ट्रिय दिवस २०२५ मनाइएको छ। माइती नेपाल, धनगढी शाखाको आयोजनामा आयोजित उक्त कार्यक्रममा प्रशासन र सरोकारवाला संघ–संस्थाबीच सम्मन्वयात्मक छलफल गरिएको हो।
कार्यक्रममा धनगढी उपमहानगरपालिका- २ का अध्यक्ष धर्मराज ओझा , माइती नेपाल धनगढीका प्रमुख शिवचरण चौधरी, जिल्ला प्रहरी कार्यालयका प्रतिनिधि, त्रिनगर भन्सार नाकामा सेवारत संस्थाका प्रतिनिधि, सञ्चारकर्मीको उपस्थिति रहेको थियो।
छलफलमा चेलीबेटी तथा बालबालिकाको बेचबिखन रोकथामका लागि कानुनी, सामाजिक र संस्थागत पक्षलाई थप प्रभावकारी बनाउनु पर्ने आवश्यकता औँल्याए। कार्यक्रममा माइती नेपालका प्रतिनिधिहरूले सीमावर्ती क्षेत्रहरूमा बढ्दो जोखिमलाई मध्यनजर गर्दै स्थानीय निकाय, प्रहरी र नागरिक समाजबीच सहकार्य र सूचना प्रवाहमा मजबुती ल्याउनुपर्नेमा जोड दिए।
माइती नेपाल धनगढीका प्रमुख शिवचरण चौधरीले आर्थिक वर्ष २०८१/०८२ मा जोखिमबाट १४० जनालाई जोगाएको तथ्याङ्क प्रस्तुत गरे । यस्तै १४३ जनालाई आवासीय सेवा प्रदान गरेको र भारतबाट ३ महिलाको उद्धार सँगै १३ हजार ८ सय ७६ जनालाई परामर्श सेवा प्रदान गरेको प्रस्तुतिकरण बाट सार्वजनिक गरे ।
मानव बेचबिखनलाई रोक्न सर्वप्रथम अभिभावकले सचेत हुनु पर्ने वडा नं २ का अध्यक्ष धर्मराज ओझाले विषयको उठान गरे । उनले भने नाकामा मात्रै बसेर मानव वेचविखन रोक्न सम्भव नरहेको उनको भनाइ थियो ।
