धनगढी । राष्ट्रियसभा सदस्य पदको निर्वाचनका लागी सुदूरपश्चिममा यहिँ पौष २३ गते मनोनयन दर्ता हुने भएको छ । माघ ११ गते हुने राष्ट्रियसभा सदस्य पदको निर्वाचनका लागी यहिँ पौष २३ गते विहान १० बजे देखी दिउसो ३ बजेसम्म मनोनयन दर्ता हुने सुदूरपश्चिम प्रदेश निर्वाचन कार्यालयले जनाएको छ ।
शनिबार सुदूरपश्चिम प्रदेश निर्वाचन कार्यालयको हलमा निर्वाचन अधिकृत विष्णुप्रसाद अवस्थि, कैलालीका प्रमुख जिल्ला अधिकारी धर्मेन्द्र कुमार मिश्र, जिल्ला प्रहरी कार्यालय कैलालीका प्रहरी उपरिक्षक देवेन्द्र बहादुर पाल र विभिन्न राजनितिक दलहरुबिच छलफल भएको थियो । सो छलफलका क्रममा विभिन्न पार्टिहरुलाई मनोनयन दर्ताको समय निर्धारण गरिएको निर्वाचन कार्यालयले जनाएको छ ।
निर्वाचन कार्यालयले २३ गते विहान १० बजे देखी ३ बजेसम्म जुन पार्टि जतिबेला आएपनि मनोनयन दर्ता गर्ने भएपनि सबैको सहजताको लागी समय निर्धारण गरिएको जनाएको छ ।
निर्वाचन कार्यालयका अनुसार विहान १० बजे देखि ११ बजेसम्म नेकपा माओवादी केंद्रले मनोनयन दर्ता गर्ने समय तोकिएको छ । विहान ११ बजे देखि १२ बजे सम्म नागरीक उन्मुक्ती पार्टी, दिउसो १२ बजे देखि १ बजे सम्म नेपाली कांग्रेस, १ बजे देखि २ बजे सम्म नेकपा एमाले र दिउसो २ बजे देखि ३ बजे सम्म राष्ट्रिय प्रजातन्त्र पार्टीको मनोनयन दर्ताको समय तोकीएको छ । अन्य दलहरूको हकमा निर्वाचन आयोगले तोकेको मनोनयन दर्ता को समय १० बजे देखि ३ बजेसम्मको समय भित्र व्यवस्थापन गर्ने निर्णय गरिएको छ ।
सुदूरपश्चिम प्रदेशबाट राष्ट्रिय सभा सदस्य बनेका ३ जनाको पदावधि फागुनमा सकिँदैछ । नेकपा माओवादी केन्द्रबाट राष्ट्रिय सभा सदस्य बनेका हरिराम चौधरी उत्सव (कैलाली), महेश महरा (डडेल्धुरा) र नेकपा एमालेबाट राष्ट्रिय सभा सदस्य बनेकी इन्दु कडरिया (कञ्चनपुर)को पदावधि सकिन लागेको हो ।
रिक्त हुने स्थानमा पदपूर्तिका लागि माघ ११ मा निर्वाचन हुँदैछ । निर्वाचनमा भाग लिनका लागि सत्तारुढ गठबन्धन तथा प्रमुख प्रतिपक्षी दल नेकपा एमालेभित्र उम्मेदवार छनोटको छनफल भइरहेको छ ।
