धनगढी,दसैमा राजधानी काठमाडौबाट धनगढी फर्कने यात्रुहरुले साविकको भन्दा दोब्बर बढी मूल्यमा यात्रा गर्नु परेको भन्दै नेपाल विद्यार्थी संघ र तरुण दल कैलालीले संयुक्तहरुमा आइतबार धनगढी एयरपोर्ट घेराऊ गरेका छन् ।
नेविसंघ कैलाली र तरुण दल कैलालीका युवाहरुले धनगढी बिमानिस्थलमा पुगेर भाडा दर बृद्धीको बिरोधमा नाराबाजी गरेका हुन् । अहिले काठमाण्डौबाट धनगढी आउने हवाई भाडामा एयरलाइन्स कम्पनीहरुको मनपरी बढाएको छ । चाडपर्व सुरु भएसँगै हवाई भाडामा ६ हजारले वृद्धि गरिएको छ ।
काठमाण्डौँबाट धनगढी आइपूग्ने यात्रुबाट १७ हजारका दरले निजी कम्पनीका एयरलाइन्सहरुले रकम असुल्न थालेका हुन् । साथै चाडपर्वमा यात्रुले महङ्गो भाडा तिरेर भए पनि हवाई टिकट पाउन भने सास्ती भइरहेको छ । यही मौकामा एयरलाइन्स कम्पनीहरुले आफुअनुकुल भाडा असुल्न थालेका हुन् ।
नेपाल विद्यार्थी संघ कैलाली अध्यक्ष मनिष कुँवरले चाडपर्वको समयमा यात्रुहरुलाई महँगो हवाई भाडा तिरेर दसैँमा घर जानुपर्ने बाध्यता भएको बताउँदै भने,‘वर्ष दिनमा ११ महिना कहिल्यै हवाई यातायातको भाडा बढ्दैन, तर दसैकै समयमा किन बढ्छ ?’ विद्यार्थी तथा सर्वसाधारणको ढाड सेक्नेगरि दोब्बर भाडा असुल्नु सरासर गलत हो ।’
आफूहरुले हवाई यातायातको मनपर्दी भाडा असुलीको विरोध गर्दै भने,‘हामीले मनपर्दी हवाई भाडा असुलीको विरोधमा बिहान १० बजेदेखि ११ बजेसम्म एयरपोर्टमा धर्ना दिँदै महँगीको विरोध गरेका हौँ ।’ हिन्दूहरुको महान पर्व वडादसैँको बेलामा छुट दिनुको साटो दोब्बर बढी भाडा असुलिनु पनि नेपाली नागरिकमाथि भ्रष्टाचार भएको आफूहरुको ठहर रहेको तरुण दल कैलालीका अध्यक्ष निराजन खड्काले बताए ।
नेपाल विद्यार्थी संघ र नेपाल तरुणदल कैलालीले संयुक्तहरुमा आन्दोलनमा होमिएको छ । काठमाडौंदेखि धनगढीसम्मको विगत ११ महिना ७ हजार ९ सय रुपैयाँ भाडा रहे पनि दसैको समयमा हरेक वर्ष दोब्बर बढी मूल्य बढाएर हवाई यातायात कम्पनीले १७ हजार १ सय रुपैयाँसम्म असुल्ने गरेका छन् । हवाई भडा दर नघटाए थठप चरणबद्ध आन्दोलनमा उत्रिने नेविसंघ कैलालीका अध्यक्ष मनिष कुँवरले जानकारी दिएका छन् ।
