धनगढी/लागूऔषध दुर्व्यसनीमा फसेकाहरूलाई राख्न कैलालीको धनगढीस्थित फूलबारीमा आसरा सुधार केन्द्र सञ्चालनमा आएको छ। एक कार्यक्रमकाबीच नेपाल प्रहरीका प्रहरी महानिरीक्षक वसन्त कुँवरले सुधार केन्द्रको उद्घाटन गरेका हुन्। धनगढी उपमहानगरपालिकाको अगुवाईमा कैलाली र कञ्चनपुरका विभिन्न पालिकाको सहयोगमा सञ्चालनमा आएको सुधार केन्द्रमा दुई सय जना राख्न सक्ने भएतापनि तत्काललाई ६० जना राख्ने बताइएको छ।
उपमहानगरपालिकाले २० वर्षसम्म नेपाल प्रहरीलाई सुधार केन्द्र सञ्चालनको लागि उक्त ठाउँ र भौतिक संरचना उपलब्ध गराएको हो। देशका अन्य स्थानमा आसरा सुधार केन्द्र नेपाल प्रहरी श्रीमती संघले सञ्चालन गर्दै आएको र धनगढीमा पनि सुधार केन्द्र दुर्व्यसनमा फसेका युवालाई सुधार्न सफल हुने विश्वास लिएको महानिरीक्षक कुँवरले बताए। खान, बस्न, उपचारलगायत सबै व्यवस्थापनका लागि भर्ना हुन न्यून शुल्क निर्धारण गरिएको प्रदेश प्रहरी कार्यालयले जनाएको छ।यस्तै कार्यक्रममा बोल्दै धनगढी उपमहानगरपालिकाका नगर प्रमुख गोपाल हमालले अहिलेको युवापुस्ता लागुऔषधको दलदलमा फस्दै गएको र युवालाई सही मार्ग निर्देशन गर्न सुधार केन्द्रले भूमिका खेल्ने बताएका छन्।लागूऔषधको कुलतमा फस्ने युवायुवतीको सङ्ख्या बढ्न थालेपछि प्रहरीलाई जग्गा र भवन उपलब्ध गराएर सुधार केन्द्र सञ्चालन गर्न आग्रह गरिएको उपमहानगरले जनाएको छ।
सुधार केन्द्रमा भर्ना हुने दुर्व्यसनीलाई औषधि उपचारसँगै मनोपरामर्श र ध्यान, योगहरू गराइने प्रहरीले जनाएको छ। दुर्व्यसनीलाई चार महिनादेखि आवश्यकताअनुसार त्योभन्दा बढी समय राखिने भएको हो। सुधार केन्द्रमा रहँदासम्म उपचारसँगै मानसिक रोग विशेषज्ञले उनीहरूका आनीबानीको नियमित निगरानी गर्ने र कुलतमुक्त भएपछि घर पठाइने बताइएको छ।
