जमुना न्युरे,धनगढी/ दार्चुलाको नौगाड गाउँपालिका–२, सल्ला गाउँमा आएको बाढी र पहिरोमा परि ज्यान गुमाएका परिवारका आफन्त तथा घरबारबिहीन भएकाहरुका लागि संघीय सरकार र सुदूरपश्चिम प्रदेश सरकारले राहत तथा उद्धारको कार्यलाई तिव्रता दिएको छ ।
वाढीमा परेर पिडित भएकाहरुलाई उद्धार तथा राहत सामाग्री लिएर संघिय सरकार र प्रदेश सरकारका मन्त्रीहरुको टोली दार्चुला गएको छ । राहत सामाग्री बोकेर उद्योग वाणिज्य तथा आपुर्ति मन्त्री दिलेन्द्रप्रसाद वडु, सुदुरपश्चिम प्रदेश सरकारका आन्तरिक मामिला तथा कानुन मन्त्री डाक्टर रणवहादुर रावल र उद्योग पर्यटन वन तथा वातावरण मन्त्री मानवहादुर धामी सहितको टोली घटनास्थल गएको हो ।
टोलीले आवश्यक राहत र उद्धारको कामलाई थप तिव्रता दिने दार्चुला जानेक्रममा उद्योग वाणिज्य तथा आपुर्ति मन्त्री दिलेन्द्रप्रसाद वडुले बताए । ‘हामी पिडितहरुको उद्धारमा लागिरहेका छौं । घाईतेहरुलाई सदमुकाम छोडिएको छ । सुत्केरी महिलालाई पनि उपचारमा पठाईएको छ ।
‵ मन्त्री वडुले भने, ‘हामी धनगढीमा पनि राहतको जोहो गरिरहेका छौं । प्रदेश सरकार मार्फत पनि व्यवस्था गरिएको छ । हामी सकेसम्म त्यो ठाउँमा पुग्छौं । हेर्छौ र आवश्यकता अनुसार थप गर्नुपर्ने काम गछौं ।’
दार्चुलामा उपचार सम्भब नभएका घाईतेहरुलाई उपचारका लागि धनगढी ल्याईने मन्त्री बडुले जानकारी दिए । उनले आवश्यक राहत र उद्धारका लागि सरकारलाई जानकारी गराएको र सबै सुरक्षा निकाय तयारी अवस्थामा बसेको उनको भनाई छ ।
यता सुदूरपश्चिम प्रदेश सरकारले पनि राहत सामाग्री सहितको हेलिकोप्टर दार्चुलाको नौगाड पठाएको छ ।
प्रदेशको आन्तरिक मामिला तथा कानुन मन्त्रालयले त्रिपाल, कम्पल, औषधी लगायतका तत्काल आवश्यक पर्ने राहत सामाग्री दार्चुला पुराईएको छ । पहिलो चरणमा आवश्यक पर्ने राहत सामाग्रीहरु पठाईएको र बाँकी राहत सामाग्रीहरु आवश्यकताका आधारमा क्रमशः पठाईने आन्तरिक मामिला तथा कानुन मन्त्री डाक्टर रणवहादुर रावलले जानकारी दिए ।
‘तत्काल गर्नुपर्ने उद्धारमा प्रदेश सरकार लागिपरेको छ । जसको लागि राहत सामाग्री सहित नेपाली सेनाको हेलिक्टर दार्चुला पठाईएको छ । तीनै तहका सुरक्षा निकायलाई राहत तथा उद्धारमा खटाईएकोे छ । जिल्ला प्रशासन कार्यालय र सामाजिक संघसंस्थाहरुलाई पनि सहयोगका लागि आग्रह र अपिल गरेका छौं ।
‵ मन्त्री रावलले भने,–‘थप उद्धार र राहतको काम गर्नुपर्ने भएमा प्रदेश सरकारले थप अर्को हेलिक्टर सहित राहत सामाग्री तैनाथ अवस्थामा राखेका छौं ।
अन्य आवश्यकता अनुसारका सामाग्रीहरु तयारी अवस्थामा राखेका छौं ।’ दार्चुलाका वाढी पिडितहरुको राहत र उद्धारका लागि प्रदेश सरकारले कुनै कसर बाँकी नराख्ने समेत मन्त्री रावलले बताए ।
शुक्रबार रातिको अविरल वर्षाकै कारण जिल्लाको नौगाड गाउँपालिका–२, सल्ला गाउँमा आएको पहिरोले बस्तीमा ठूलो क्षति पुगेको छ ।
