टीकापुर/ कैलालीको टीकापुर लगायतका विभिन्न क्षेत्रमा राजनीतिक दलहरु चुनावकाे आन्तरिक तयारीमा जुटेका छन् ।सरकारले स्थानीय तहको निर्वाचन मिति तोकेसँगै राजनीतिक दलहरु आन्तरिक तयारीमा जुटेर चुनावी सरगर्मी बढेको हाे ।
सरकारले वैशाख ३० मा स्थानीय तहकाे निर्वाचन मिति ताेकेपछि निर्वाचन आफ्नो पक्षमा पार्न यतिबेला राजनीतिक दलहरु आन्तरिक तयारीमा जुटिरहेका हुन ।
राजनीतिक दलहरु वडा तथा टाेल बस्तीमा पुगेर विभिन्न कमेटीहरु गठनमा जुटेका छन भने कुन वडामा आफ्नो पार्टीको पक्कड के कति छ भनेर आंकल गर्न थालेका छन् ।
चिया पसल देखि दारुकाे भट्टीमा समेत राजनीतिक चर्चाले बढी स्थान पाएको जानकारहरु बताउन्छन । केही पार्टीले केही उम्मेदवारी सार्वजनिक गरेपनि पार्टीले आधिकारीक उम्मेदवारी घाेषणा नगर्दै केही पार्टीका कार्यकर्ताहरु साेघाेसित उम्मेदवारका रुपमा आफुलाइ अगाडि सारेका छन् ।
निर्वाचन आयोग समेत चुनावी तयारीमा जुटि रहेकाे बेला टीकापुर नगरपालिकामा मतदाताको संख्या कति छ भनेर आम चासोको बिषय समेत बनिरहेको अवस्था छ । निर्वाचन आयोगले हाल सम्मको मतदाता संख्या सार्वजनिक गरेको छैन । यद्यपि आयोगको वेभसाइटमा २०७७ पौष मसान्तसम्म १८ वर्ष उमेर पुगेका मतदाताको संख्या ५० हजार ४ शय ८१ रहेको छ ।
वेभसाइटमा उपलब्ध तथ्यांकका अनुसार सबैभन्दा बढी वडा नं. १ मा २० हजार १ सय ५४ मतदाता रहेका छन् भने सबैभन्दा कम वडा नं.९ मा छन् ।
वडा नं. २ मा ५ हजार १ सय, वडा नं. ३ मा ३ हजार २ सय ६८, वडा नं. ४ मा ३ हजार २ सय ५८ मतदाता रहेका छन् ।
त्यस्तै वडा नं. ५ मा ४ हजार ८ सय २३, वडा नं. ६ मा ३ हजार ३ सय ५७, वडा नं. ७ मा ४ हजार ४ सय ७३ , वडा नं. ८ मा ३ हजार ६ सय ७० र वडा नं. ९ मा २ हजार ३ सय ७८ मतदाता रहेका छन् ।
यही तथ्यांकलाई आधार मान्ने हो भने टीकापुर नगरपालिकामा कुल ५२ हजार बढी मतदाता हुने अनुमान गरिएको छ ।
