जमुना न्युरे,धनगढी/कैलाली बहुमुखी क्याम्पसले प्रथम राष्ट्रिय सम्मेलन आयोजना गर्ने भएको हो। शिक्षा, समाज, व्यवस्थापन र विज्ञानको क्षेत्रमा विद्यमान ज्ञान,सीप र अनुभवको उजागर गर्न दुई दिने राष्ट्रिय सम्मेलन आयोजना हुने भएको हो ।
बिहीवार धनगढीमा पत्रकार सम्मेलन गर्दै चैत १८ र १९ गते क्याम्पसले प्रथम राष्ट्रिय सम्मेलन गर्न लागेको बताइएको छ। सम्मेलनमा सुदूरपश्चिम विश्वविद्यालय, त्रिभुवन विश्वविद्यालय, मध्यमाञ्चल विश्वविद्यालय, गण्डकी विश्वविद्यालय, नेपाल संस्कृत विश्वविद्यालय, काठमाडौं विश्वविद्यालय, पूर्वाञ्चल विश्वविद्यालय र भारतको उत्तर प्रदेशको लखनउ विश्वविद्यालयलका अनुसन्धानकर्ता प्राध्यापकहरूको सहभागी रहने सम्मेलनका संयोजक सहप्राध्यापक मोहनसिंह साउँदले पत्रकार सम्मेलनमा बताए।
दुई दिनसम्म चल्ने सम्मेलनमा शिक्षा, समाज, व्यवस्थापन र विज्ञान विधामा ६२ जना अनुसन्धानकर्ताले अनुसन्धान पत्र प्रस्तुत गर्ने छन्। कैलाली बहुमुखी क्याम्पसको सभा हलमा चैत १८ गते ८ बजे सम्मेलनको उद्घाटन गरिने छ। उद्घाटन सत्रमा मुख्य वक्ताका रुपमा प्राध्यापक नन्दबहादुर सिंहलाई चयन गरिएको छ। दुई दिनसम्म विहान ८ बजेदेखि साँझ साढे तीन बजेसम्म सम्मेलनमा अनुसन्धान पत्र प्रस्तुति र छलफल गरिने संयोजक साउँंदले बताए।
पत्रकार सम्मेलनमा क्याम्पसका सहप्राध्यापक डाक्टर राजेन्द्रवीर चन्द, सहप्राध्यापक ठाकुरप्रसाद ढुङ्गेलले क्याम्पसले पहिलो पटक प्राज्ञिक सम्मेलन गर्न लागेको र यो कुरालाई क्याम्पसले निरन्तरता दिने बताएका छन्। सम्मेलनको उदेश्य समाजका मौलिक ज्ञान, व्यवहार र संस्कारको अध्ययन गरेर मौलिक ज्ञान र संस्कारको उजागर गर्नु रहेको आयोजकले बताए
