सुखड/कैलालीको घोडाघोडी नगरपालिका–१ सुखडमा रहेको राष्ट्रिय माध्यमिक विद्यालयले अस्थायी घर टहरा गरी निर्माण भएका संरचना हटाउन ७ दिनको समय दिएको छ ।
सोमबार एक सूचना प्रकाशित गरी विद्यालयको नाममा दर्ता स्रेस्ता कायम रहेको ८ कट्ठा क्षेत्रफल भएको कित्ता नं.९७ मा निमार्ण गरिएका अस्थायी घर टहरा तथा विभिन्न संरचना आफ्नै तरिकाले हटाउन निर्देशन दिएको हो ।
३५ दिने सूचना प्रकाशित पछि विद्यालयले अर्को ७ दिनको सूचना निकालेको हो । सो समयमा खाली नगरेको खण्डमा जुनसुकै सयमा पनि विद्यालयले बल प्रयोग गरी खाली गर्दा हुने व्यक्तिगत धनजनको नोक्सानीको जिम्मेवारी स्वयम् व्यक्तिले लिनु पर्ने सूचनामा उल्लेख गरिएको छ । सूचना प्रकाशित भएको ७ दिन भित्र अर्थात् फागुन २० गते सम्म आफै हटाई सक्नु पर्ने राष्ट्रिय माध्यमिक विद्यालयले भनेको छ ।
सूचनामा विद्यालयले घोडाघोडी नगरपालिका, वडा नम्बर १ को कार्यालय, इलाका प्रशासन कार्यालय सुखड, इलाका प्रहरी कार्यालय सुखड, जिल्ला प्रशासन कार्यालय धनगढी, जिल्ला समन्वय समिति कैलाली,नेपाल विद्युत प्राधिकरण शाखा कार्यालय भजनी र विद्युत कार्यालय पहलमानपुरलाई बोधार्थ समेत लेखेको छ । आर्थिक वर्ष २०७६/२०७७ मा सङ्घीय सरकारबाट प्रत्येक प्रदेशमा निमार्ण गर्ने नमुना विशेष आवासीय विद्यालय अन्तर्गत प्राप्त अनुदान बाट निमार्ण गर्ने छात्रावास,क्यान्टिन, र थेरापी भवन बनाउन विद्यालय लागी परेको छ ।
