जेष्ठ १४,कैलाली/सुदुरपश्चिम प्रदेशका मुख्यमन्त्री कमलबहादुर शाहले आर्थिक वर्ष २०८२।०८३ को वार्षिक नीति तथा कार्यक्रममा समेट्नु पर्ने विषयमा प्रदेश सभाका सदस्यहरुसँग सुझाब माग गर्नु भएको छ ।
बुधबार धनगढीमा आर्थिक वर्ष २०८२।०८३ को वार्षिक नीति तथा कार्यक्रम सम्बन्धी प्रदेश सभाका सदस्यज्यूहरुसँगको अन्तरक्रिया कार्यक्रम मार्फत मुख्यमन्त्री शाहले सुझाब माग गर्नु भएको हो । उहाँले जनताले प्रत्याभुत गर्नसक्ने र प्रदेश सभाका सबै सदस्यहरुले अपनत्व लिने खालका नीति तथा कार्यक्रम ल्याउन प्रदेश सरकार लागि परेकोले सोही बमोजिमका सुझाब दिन अनुरोध गर्नुभयो । उहाँले आफ्नो पहिलो कार्यकाल आर्थिक वर्ष २०८०।८१ मा ल्याएको र आर्थिक वर्ष २०८१।०८२ वार्षिक नीति तथा कार्यक्रम राख्दै आर्थिक वर्ष २०८२।०८३ वार्षिक नीति तथा कार्यक्रम तयारीका लागि सुझाब माग गर्नु भएको हो ।
यसअघी आ ब २०८०।८१ मा नेपाली काँग्रेस, माओवादी, समाजबादी र नागरिक उन्मुक्ति सहित दलको सहभागितामा र आर्थिक वर्ष २०८१।०८२ मा एमाले, माओवादी, समाजबादी, नागरिक उन्मुक्ति दलको सहभागितामा वार्षिक नीति तथा कार्यक्रम ल्याएको थियो । आर्थिक वर्ष २०८२।०८३ वार्षिक नीति तथा कार्यक्रममा भने मुख्यमन्त्री शाहले प्रदेश सभाका सबै सदस्यहरुसँग सुझाब माग गरी नीति तथा कार्यक्रम ल्याउने तयारी गर्नु भएको छ । मुख्यमन्त्री शाहले सुदुरपश्चिमका नागरिकहरुको माग र चाहना अनुरुप दीगो बिकास गर्न प्रदेश सरकार लागि परेको बताउनु भयो ।
भष्ट्राचारमा शून्य सहनशिलताको नीति लिएको प्रदेश सरकारले बजेटमा ९ वटा क्षेत्रका योजनाहरु प्राथमिकतामा राखेको छ । १. कृषिको आधुनिकीकरण तथा व्यवसायीकरण, २. पर्यटन विकास, ३. गुणस्तरीय भौतिक पूर्वाधार विकास (ऊर्जा, यातायात, संचार, आवास,खानेपानी र सिँचाइ), ४. सामाजिक विकास (शिक्षा, स्वास्थ्य, सामाजिक सुरक्षा, संरक्षण एवम् रोजगारी), ५. औद्योगिकीकरण, ६. गरिबी निवारण, ७. जडिवुटीको उत्पादन सहितको वन तथा वातावरण मैत्री हरित विकास, ८. संस्थागत सवलीकरण र सुशासन र ९. डिजिटल प्रदेश रहेका छन ।
