धनगढी/धनगढीमा नेपाली काँग्रेस सुदूरपश्चिम प्रदेशस्तरीय नेतृत्त्वबीच महत्वपूर्ण राजनीतिक छलफल सम्पन्न भएको छ ।
सुदूरपश्चिम प्रदेशका मुख्यमन्त्री कमल बहादुर शाहको संयोजनमा भएको उक्त छलफलमा नेपाली काँग्रेसका केन्द्रीय सदस्य, सुदूरपश्चिम प्रदेश कार्यवाहक सभापति, राष्ट्रिय सभाका सांसद, प्रदेश सरकारका मन्त्री, पार्टीका प्रदेशस्तरीय पदाधिकारी, कैलाली–कञ्चनपुरका जिल्ला सभापति, प्रदेशसभा सदस्य र जिल्लास्तरीय पदाधिकारीहरुको सक्रिय सहभागिता रहेको थियो ।
बैठकमा वर्तमान राष्ट्रिय राजनीतिको परिस्थिति, संघीय लोकतान्त्रिक व्यवस्थाको कार्यान्वयन र पार्टी संगठनलाई अझ सुदृढ बनाउने विषयमा गहन छलफल गरिएको थियो । सहभागी नेताहरुले मुलुक अहिले जटिल राजनीतिक मोडमा रहेको भन्दै लोकतन्त्रको रक्षा, संविधान कार्यान्वयन र सुदूरपश्चिम प्रदेशको समग्र विकासका लागि काँग्रेसलाई अझ जिम्मेवार र एकताबद्ध भएर अघि बढ्नु पर्नेमा जोड दिएका थिए ।
नेताहरुले पार्टीभित्र देखिएका असन्तुष्टि र अन्तरविरोधलाई अन्त्य गर्दै आन्तरिक जीवनमा मजबुत एकता कायम गर्नु अहिलेको आवश्यकता भएको बताएका छन् । छलफलमा प्रदेश सरकारका मन्त्रीहरुले आफ्ना अनुभव र योजना प्रस्तुत गरेका थिए भने सांसद तथा जिल्लास्तरीय नेताहरुले स्थानीय स्तरका जनचासोका विषयमा धारणा राखेका थिए ।
कार्यक्रमलाई सम्बोधन गर्दै मुख्यमन्त्री शाहले नेपाली काँग्रेसको बलियो संगठनात्मक एकता नै लोकतन्त्रको स्थायित्व र जनताको विश्वासको आधार हुने बताए । उनले सुदूरपश्चिम प्रदेशमा काँग्रेसलाई अझ प्रभावकारी बनाउँदै विकास, सुशासन र समृद्धिको मार्गमा अघि बढाउने प्रतिबद्धता व्यक्त गरे ।
यसैगरी सहभागी नेताहरुले नियमित संवाद, सहकार्य र सामूहिक निर्णय प्रक्रियामार्फत पार्टीलाई मजबुत बनाउनुपर्ने निष्कर्ष निकालेका छन् । छलफल सकारात्मक र परिणाममुखी रहेको भन्दै आगामी दिनमा पनि यस्ता कार्यक्रम निरन्तर गर्ने सहमति गरिएको छ ।
