टिकापुर / घाँटी छिनालेर हत्या गरिएका कैलालीका अर्जुन दासका हत्यारालाई कानूनी दायरामा ल्याउनुपर्ने भन्दै प्रदर्शन भएको छ । हत्याको विरोधमा टीकापुरस्थित ईलाका प्रहरी कार्यालय अगाडि स्थानीयले मंगलवार प्रदर्शन गरेका हुन् ।
प्रहरीका अनुसार सामुदायिक वनको करीब १ किलोमिटरभित्र दासको विभत्स र क्रुर ढंगले हत्या गरिएको छ । उनलाई रुखमा बाँधेर नग्न बनाइ घाँटी छिनालेर हत्या गरिएको छ । प्रहरीले उनको शव पोस्टमार्टमका लागि सोमवार नै टीकापुर अस्पतालमा राखेको छ । मृतकका आफन्तले शव बुझ्न मानेका छैनन् । यसैबीच प्रहरीले १ जनालाई पक्राउ परेको छ तर पक्राउ पर्ने व्यक्तिलाई हालसम्म सार्वजनिक गरिएको छैन ।
मृतक दासको हत्यापछि फोनमा भएको कुराकानीको अडियोको माध्यमबाट प्रहरीले अनुसन्धान गरिरहेको छ । अडियोमा ‘मनोज’ नाम गरेका व्यक्तिले अर्जुनको हत्या गरेर भारततर्फ जान लागेको बताएका छन् । मनोज नाम गरेका व्यक्तिले आफूले दासको हत्या गरेर रुपैडिया नाका हुँदै भारत गइरहेको बताएका छन् । ‘दाइ मनोज बोल्न लाछु,’ फोन कुराकानीमा भनेका छन्, ‘घाँटी छिनाले दाइ, हामी ब्याङ्लोर हिँडिसक्यौं । अहिले रुपैडिया नाका छु ।’
