सुखड/घोडाघोडी नगरपालिका–१० पहलमानपुरमा सञ्चालित बाँसबाट हस्तकलाको सामाग्री बनाउने सिप विकास तालिमको सम्पन्न भएको छ । पालिकामा रहेको गरिबी निवारणका लागी लघु उद्यम विकास कार्यक्रम(मेड्पा)को आयोजनामा जेठ १७ गते देखी ३१ गते सम्म तालिम सञ्चालन गरीएको थियो ।
नगर प्रमुख खडक बहादुर रावतको प्रमुख आतिथ्यमा सम्पन्न एक कार्यक्रमका बिच तालिममा सहभागीलाई प्रमाणपत्र वितरण गरिएको थियो । समापन कार्यक्रममा बोल्दै नगर प्रमुख रावतले तालिम बाट सिकेका कुराहरू पूर्ण रूपमा व्यवहारमा लागु गर्न सहभागीहरूलाई आग्रह गरे ।
तालिममा सिकेको सिप,ज्ञान,प्रविधिलाई व्यावहारिक रुपमा कार्यान्वयन गर्न सके आत्मनिर्भर बनिने उनको भनाई थियो । सीप सिकेपछि पेसा तथा व्यवसाय सञ्चालन गरेर सफल उद्यमी बन्न सकिने उनको भनाई थियो । यस तालिम बाट आय आर्जन गर्नमा ठुलो भूमिका खेल्ने उनको भनाई थियो । बाँसका सामग्रीको बजारीकरणका लागि नगरपालिकाले कोसेली घरको निर्माण गर्ने योजना बनाएको नगर प्रमुख रावतले बताए ।
कार्यक्रममा योजना शाखाका प्रमुख जयन्त कुमार विष्टले सिकेको सीपलाई व्यवहारमा लागु गरी सफल लघु उद्यमी बन्न आग्रह गरे । स्थानीय कच्चा पदार्थको उपयोग गरी आयआर्जन बढाउन यो तालिमलाई अवसरको रुपमा प्रयोग गर्न उहाँको सुझाव थियो ।
वडा नम्बर १० का अध्यक्ष विजय राज स्वारले आर्थिक सशक्तीकरण सहित अर्थोपार्जनका गतिविधिमा सहभागी बनाउन वडा कार्यालय लागी परेको उनले बताए । सिप विकास सहितको रोजगारी सृजना आजको आवश्यकता भएको वडा अध्यक्ष स्वारको भनाई थियो ।
तालिममा वडा नम्बर १० बाट छानिएका १५ जना महिला तथा पुरुष प्रशिक्षार्थीहरू रहेका थिए । प्रशिक्षार्थीहरूको आर्थिक अवस्था बलियो हुने र जीविकोपार्जन तथा आयआर्जनमा टेवा पुग्ने उद्देश्यले तालिम सञ्चालन गरीएको लघु उद्यम विकास कार्यक्रमका सहजकर्ता जुगिना चौधरीले बताए ।
