कैलालीको घोडाघोडी नगरपालिका–१ सुखड स्थित घोडाघोडी सामुदायिक ग्रामीण विद्युत् सहकारी संस्था लिमिटेडको ११ औँ वार्षिक साधारण सभा सम्पन्न भएको छ । संस्थाका अध्यक्ष सरोज न्यूरेको सभाध्यक्षतामा सम्पन्न कार्यक्रममा प्रमुख अतिथि घोडाघोडी नगरपालिकाका नगर प्रमुख खडक बहादुर रावत रहेका थिए ।
कार्यक्रमलाई सम्बोधन गर्दै नगर प्रमुख रावतले ग्रामीण क्षेत्रमा विद्युत् विस्तार गरी अन्धकारमा रहेका बस्तीलाई उज्यालो बनाउने उद्देश्यका साथ स्थापना गरिएको सहकारी संस्थाले स्थानीय विकासमा महत्त्वपूर्ण योगदान पुर्याएको बताए । उनले नेपालभर सञ्चालन भएका सामुदायिक ग्रामीण विद्युत् सहकारी संस्थामध्ये गत वर्ष उत्कृष्ट संस्थाका रूपमा स्थापित हुन सफल भएको उल्लेख गर्दै सहकारी परिवारलाई धन्यवाद व्यक्त गरे ।
आगामी दिनमा पनि संस्थाले उत्कृष्टताको इतिहास कायम राख्ने विश्वास उनले व्यक्त गरे । नगर प्रमुख रावतले ग्रामीण क्षेत्रमा विद्युत् विस्तार भएपछि स्थानीय नागरिकको दैनिक जीवन सहज बनेको,आवश्यक सेवा–सुविधाको पहुँच बढेको तथा गाउँ स्तरमै लघु उद्यम र व्यवसाय सञ्चालनमा सहयोग पुगेको बताए । सहकारीले समुदाय स्तरमा आर्थिक तथा सामाजिक विकासमा समेत टेवा पुर्याएको उनको भनाइ थियो ।
कार्यक्रममा संस्थाका कोषाध्यक्ष हर्क बहादुर बुढाले आर्थिक वर्ष २०८१/०८२ को ४ करोड ४९ लाख ८४ हजार ३ सय ७२ रुपैयाँ बराबरको आय–व्यय विवरण प्रस्तुत गरेका थिए । त्यसै गरी उपभोक्ताले उठाएका विभिन्न प्रश्न तथा जिज्ञासाको जवाफ संस्थाका अध्यक्ष सरोज न्यूरेले दिएका थिए । कार्यक्रममा अनुशासित १० जना उपभोक्ता उद्योगीलाई दोसल्लासहित सम्मान गरिएको थियो । साधारण सभामा विभिन्न वक्ताहरूले शुभकामना मन्तव्य व्यक्त गरेका थिए ।
संस्थाले हाल घोडाघोडी नगरपालिका वडा नम्बर २, ४, ५, ६, ७, ८ र ९, गौरीगंगा नगरपालिका वडा नम्बर ११ तथा कैलारी गाउँपालिका वडा नम्बर ८ मा विद्युत् सेवा विस्तार गरिरहेको जनाएको छ । वि.सं. २०६६ सालमा स्थापना भएको उक्त संस्थाले हाल करिब ९ हजार घरधुरीमा विद्युत् सेवा पुर्याएको छ । कार्यक्रममा जनप्रतिनिधि, साधारण सदस्य, शेयर सदस्य, उपभोक्ता लगायत विभिन्न व्यक्तिको सहभागिता रहेको थियो । संस्थाकी उपाध्यक्ष निर्मला चौधरीको स्वागत मन्तव्यबाट सुरु भएको कार्यक्रमको सञ्चालन सचिव मेघ बहादुर साउँदले गरेका थिए ।
