पछिल्ला केही दिनयता कैलालीमा असुरक्षा बढ्न थालेको छ । दैनिकरुपमा अपराधिक गतिविधि बढ्न थालेपछि आम नागरिकले असुरक्षा महसुस गर्न थालेका छन् ।
दिनदहाडै धारिलो हतियार प्रयोग गरी आक्रमण गर्ने, लुटपाट गर्ने तथा ग्याङ फाइट गर्ने जस्ता अपराधिक घटना बढ्दै गएका छन् । कैलालीमा कर्तव्य ज्यान, बलात्कार, चोरी डकैती, तस्करी तथा सामूहमा झै झगडा जस्ता अपराध बढ्दै गएको जिल्ला प्रहरी कार्यालयको तथ्याङ््कले देखाउँछ ।
जिल्ला प्रहरी कार्यालयको तथ्याङ्कअनुसार आर्थिक वर्ष ०८०/८१ मा कर्तव्य ज्यानका ११, ज्यान मार्ने उद्योगका २६, जबरजस्ती करणीका ८७, लागू औषधका ३१५ र सार्वजनिक अपराधका ३५१ घटना दर्ता भएका छन् ।
यस्तै आर्थिक वर्ष ०८१/८२ मा कर्तव्य ज्यानका १५, ज्यान मार्ने उद्योगका ३९, लागू औषधका ४६९ र जबरजस्ती करणीका ८७ घटना भएका छन् ।
अपराधिक घटना बढ््दै गएपछि शान्ति सुरक्षा मजबुद गर्न बिशेष पहल थालिएको कैलालीका प्रमुख जिल्ला अधिकारी कृष्ण प्रसाद लम्सालले सत्ती कर्णाली न्युज डटकमलाई बताए । उनले अपराधिक घटना कम गर्न थप प्रहरी परिचालन गरिएको समेत बताए ।
कैलालीमा पछिल्लो समयमा बढिरहको अपराधिक गतिविधिले समाजमा डर त्रासको भय सिर्जना भइरहेको छ । कैलालीमा सुरक्षा चुनौति थपीएको भन्दै यसलाई नियन्त्रण गर्न सरोकारवालहरुले जोड दिएका छन् ।
