धनगढी/धनगढीको शिवपुरी उत्तररामेश्वर ज्योतिर्लिङ्ग धाममा यो वर्ष हवनात्मक रुद्रयाग, शनि संकटा तथा पद्म पुराण अनुष्ठान गरिने भएको छ । धाम व्यवस्थापन समितिले बिहीबार पत्रकार सम्मेलन गर्दै फागुन २ देखि १५ गतेसम्म अनुष्ठान सञ्चालन गर्ने जानकारी दिएको हो।
अनुष्ठानका क्रममा सङ्गीतमय श्रीमद्भागवत कथा प्रवचन, विश्व कल्याण श्रृङ्गारिक महाआरती लगायत धार्मिक कार्यक्रम हुने समितिका अध्यक्ष मदनबहादुर कुँवरले बताएका छन् ।
धार्मिक अनुष्ठानलाई भव्य बनाउन आवश्यक तयारी थालिएको बताउँदै कुँवरले भक्तजनहरूलाई सहभागी हुन आग्रह गरे। साथै, शिवपुरी धामलाई सुदूरपश्चिमकै आध्यात्मिक केन्द्रका रूपमा विकास गर्न इमानदार प्रयास गरिने उनले बताए। शिवपुरी धाममा यो वर्ष हुने १५ दिने धार्मिक अनुष्ठानमा कथा वाचीका अनुराधा पाण्डेसमेत आउने भएकी छन्।
