सुखड/कैलालीको घोडाघोडी नगरपालिका–१ सुखडमा दोस्रो घोडाघोडी सांस्कृतिक तथा पर्यटन महोत्सव २०८१ सुरु भएको छ । घोडाघोडी सामाजिक सरोकार केन्द्रले आयोजना गरेको महोत्सवको एक कार्यक्रमका बिच नगर प्रमुख खडक बहादुर रावतले उद्घाटन गरेका थिए ।
कार्यक्रममा बोल्दै नगर प्रमुख रावतले महोत्सवले स्थानीय कला संस्कृति संरक्षण र पहिचान सँगै यस क्षेत्रमा रहेका पर्यटकीय क्षेत्रहरूको प्रचार प्रसारका लागि महत्त्वपूर्ण भूमिका निर्वाह गर्ने उनले उल्लेख गरे । “कृषि पर्यटन उद्योग र व्यापार,समृद्ध घोडाघोडीको आधार” भन्ने मूल नाराका साथ सुरु भएको महोत्सव फागुन ९ गते देखि १८ गते सम्म सञ्चालन हुने छ ।
महोत्सवमा ख्याति प्राप्त कलाकार देखि स्थानीय कलाकारहरूको प्रस्तुति रहने छ । फागुन १८ गतेसम्म सञ्चालन हुने महोत्सवमा विभिन्न स्टल निर्माण गरिएका छन् । महोत्सव अवलोकनका लागि टिकटमा सर्वसाधारण लाई एक सय, विद्यार्थीका लागि ७० र अशक्तका लागि छुटको व्यवस्था गरिएको छ ।
महोत्सव स्थलमा सुरक्षा व्यवस्था पनि कडा पारिएको छ । घोडाघोडी सामाजिक सरोकार केन्द्रका अध्यक्ष नवीन क्षेत्रीको सभापतित्व सँगै सुरु भएको कार्यक्रमका प्रमुख अतिथि घोडाघोडी नगरपालिका मेयर खडक बहादुर रावत रहेका थिए । कार्यक्रममा विभिन्न व्यक्तिहरूले सहभागिता रहेको थियो । घोडाघोडी सामाजिक सरोकार केन्द्रका सदस्य राजु अवस्थिको स्वागत मन्तव्य सँगै सुरु भएको कार्यक्रमको सञ्चालन उद्धोषिका तथा गायिका मञ्जु पौडेलले गर्नु भएको थियो ।
