जमुना न्युरे,धनगढी / कैलालीको चुरे गाउँपालिका–४ स्थित टाँकगडा र पनेरुगडा वन दुई वर्षअघिसम्म अतिक्रमणको चपेटामा थियो । ती दुवै वनको एक सय ५ हेक्टर क्षेत्रफल अतिक्रमणकारीको कब्जामा थियो । उक्त अतिक्रमित जग्गामा चार सय ८५ घर टहरा निर्माण गरिएका थिए ।
उक्त जग्गामा खनजोत गरी बालिनाली समेत लगाइएको थियो । टाकँगडा र पनेरुगडामा दुई विद्यालय निर्माण गरिएका थिए । तर डिभिजन वन कार्यालय धनगढीको सक्रियतामा २०७९ जेठमा सबै घर टहरा हटाइए । डिभिजन वन कार्यालय धनगढीका प्रमुख केशव पराजुलीको नेतृत्वमा नेपाल प्रहरी, सशस्त्र प्रहरी, वन रक्षकसहितको टोलीले दुवै वनमा गरिएको अतिक्रमण हटाएको थियो ।
टाँकगडा र पनेरुगडामा पहिरो पीडितका नाममा वन अतिक्रमण गरिएको थियो । आमपानी, सैन र सिउती गाउँका बासिन्दाले वन अतिक्रमण गरेका थिए । तर अतिक्रमण हटाएपछि भने हाल हरियाली छाएको छ । वन हरिया रुख विरुवाले ढकमक्क भएको छ । अहिले जताजतै हरियाली नै हरियाली देखिन्छ ।
वन दिनप्रतिदिन रुखले भरिँदै गएको डिभिजन वन कार्यालय खैरालाका प्रमुख मनोज ढकालले बताए । खासमा ती दुवै वनमा राजनीतिक दलको संरक्षणमा अतिक्रमण गरिएको थियो । वनमा रहेका वाँकी घर टहरा पनि चाँडै हटाइने ढकालले बताए ।
